थप ५३५ जहनमे संक्रमण, १३ के मृत्यु
काठमाडौं, ३ कार्तिक । बिटल २४ घण्टामे नेपालमे कोरोना भाइरस संक्रमणसे १३ जहनके मृत्यु हुइल बा । देशभर कैके १३ जहनके मृत्यु हुइल स्वास्थ्य तथा जनसंख्या मन्त्रालय बुधके रोज जानकारी डेले बा । यी सँगे कोरोनासे मृत्यु हुइनाके संख्या ११ हजार ३१८ पुगल बा ।
अस्टेक, २४ घण्टामे ७ हजार २२ पीसीआर परीक्षणमे बुधके रोज थप ५३५ जहनमे संक्रमण पुष्टि हुइल बा । यी सँगे नेपालमे पीसीआर परीक्षणसे संक्रमित हुइनाके संख्या ८ लाख ७ हजार ५२ पुगल बा ।
अस्टेक एन्टिजेन विधिसे करल १ हजार ४०४ परीक्षणसे १२७ जहनमे पोजिटिभ डेखाइल बा । २४ घण्टामे पीसीआर ओ एन्टिजेन विधिसे करल ८ हजार ४२६ परीक्षणमे ६६२ जहनमे संक्रमण पुष्टि हुइल मन्त्रालय जनैले बा ।
२४ घण्टामे थप ७५८ जाने संक्रमणमुक्त हुइल बटैं । हालसम ठिक हुइनाके संख्या ७ लाख ८४ हजार १५५ रहल बा ।
हालसम देशभर ४३ लाख ४३ हजार ६४० नमुनाके पीसीआर परीक्षण हुइल बा । क्वारेन्टाइनमे २२७ जाने रहल बटैं कलेसे आइसोलेसनमे रहलके संख्या ११ हजार ५७९ रहल बा ।
