भीमबहादुरके हत्याराहे कारबाही कैना मंचके माग
पहुरा समाचारदाता
धनगढी, ४ कार्तिक । मानवअधिकार संरक्षण मंच नेपाल सुदूरपश्चिम प्रदेश समितीसे चितवनके भीमबहादुर विश्वकर्माके जघन्य हत्यामे संलग्नहे कडा कारबाहीके माग करले बा ।
मंचके अध्यक्ष डिल्लीराज जोशी ओ प्रदेश सचिव राजेन्द्र रैकासे बिफेक रोज एक प्रेस विज्ञप्ति जारी करटी भीमबहादुरके हत्यारा उप्पर कडासे कडा कारबाही कैना उहाँक परिवारहे न्यायपूर्ण क्षतिपूर्तिके माग करले बटै ।
भरतपुर महानगरपालिका–४ के ५८ वर्षीय भीमबहादुरके २८ कुवाँरमे स्थानीयके कुटपिटसे मृत्यु हुइल रहे । स्थानीयवासीसे जातीय विभेदके सोचके कारण भीमबहादुरके हत्या करल ठहर मानवअधिकार संरक्षण मंच नेपालसे करले बा । ‘दुर्गा मन्दिरमे पूजा करे पाई परल कना माग करेबेर सामन्य विवादमे कुटपिट करके जघन्य हत्या करल घटनाप्रति मानवअधिकार संरक्षण मंच नेपालके गम्भीर ध्यानाकर्षण हुइल बा ।
यी अमानवीय पासविक घटनाके घोर भर्त्सना करटी,’ मंचके अध्यक्ष जोशी ओ रैका विज्ञप्ति मार्फत् कहले बटै, ‘दलितफे मन्दिरमे पूजा करे पाई पर्ना बाट उठाइल भरमे पिटपिट हत्या कैना अमानवीय प्रवृतिके निन्दा करटी ।’
स्थानीयके पिटाईसे सख्त घाहिल हुइल विश्वकर्माहे अचेत अवस्थामे उपचारके लाग अस्पताल लैजैना क्रममे चिकित्सकसे विश्वकर्माके मृत्यु हुइल घोषणा करले रहिट ।
