तत्काल राहत तथा क्षतिपूर्तिके व्यवस्थापन कैना आग्रह
पहुरा समाचारदाता
धनगढी, ४ कार्तिक । बाढ पहिरोके प्रकोपसे हुइल धनजनके क्षतिप्रति दुःख व्यक्त करटी थरुहट थारुवान राष्ट्रिय मोर्चा संयोजन समिति कैलाली तत्काल राहत तथा क्षतिपूर्तिके ब्यवस्थापन कैना आग्रह करले बा ।
जिल्ला संयोजक माधव चौधरी प्राकृतिक विपत्तीके कारण समग्र किसानवर्गमे हुइल अतुलनीय क्षतिके क्षतिपूर्ति ओ प्रोत्साहन कैना तत्काल राहत तथा क्षतिपूर्तिके व्यवस्थापन कैना अपिल करल हुइट । ‘यिहे कुवाँर ३१ गतेसे कार्तिक २ गतेसम निरन्तर अविरल वर्षाके कारण बाढ पहिरोके विपत्तीमे परके ज्यान गुमाइलप्रति हार्दिक श्रद्धाञ्जली अर्पण करटी,’ उहाँ कहलै, ‘घाहिलहुकनके शिघ्र स्वास्थ्यलाभके कामना करटी, ज्यानके प्रवाह नइकरके उद्धारमे अहोरात्र खटल सुरक्षाकर्मी, सरकारी गैरसरकारी निकायके प्रतिनिधि आम स्वयंसेवकहुकनहे हार्दिक धन्यवाद ज्ञापन करटी ।’
यी प्राकृतिक विपत्तीके कारण देश भर आम किसानवर्गके अतुलनीय क्षति हुइल बा । यी विपत्ती धानवालीके नाश केल नइहुके आगामी हिउँदे वालीहेफे प्रतिकुल असर परे सेक्ना सम्भावना रहल ओरसे दिर्घकालिन प्रकोपहे मध्यनजर करके तत्काल राहतके प्याकेज आघे सारके जनताहे प्रोत्साहन कैना, सही ओ सत्य तथ्यतथ्यांक संकलन करके क्षतिके सही मूल्यांकन करके तत्कालक्षति पुर्ति व्यवस्थापन कैना मोर्चासे प्रेस विज्ञप्ति मार्फत आग्रह करले बा । ओस्टेक समस्यामे परल आमजनसमुदायहे सहयोग ओ राहत तथा उद्धारमे जुट्न समग्र स्वयंसेवीजनमे हार्दिक अपिलफे करले बा ।
