प्रधानमन्त्री देउवा कैलारीके बाढीपीडित किसानके समस्या बुझ्लै
पहुरा समाचारदाता
हसुलिया, ५ कार्तिक । प्रधानमन्त्री शेर बहादुर देउवा कैलालीके कैलारी गाउँपालिकाके बाढी पीडित किसानन्के गाउँमे जाके समस्या बुझ्ले बाटै ।
प्रधानमन्त्री देउवा किसानहुक्रनके समस्या बुझ्ना शुकके रोज वडा नम्बर ७ अन्र्तगतके रामपुर गाउँ पुगल रहिट । बाढ पहिरो पीडितहुक्रनके समस्या बुझे सुदूरपश्चिम आइल प्रधानमन्त्री देउवा कैलारीके किसानहुक्रनके फेन समस्या बुझले बाटै ।
गाउँपालिका अध्यक्ष लाजुराम चौधरी बाढ पीडित किसानहुक्रनके समस्या तथा पीडा प्रधानमन्त्री समक्ष दर्शाइल रहिट । अध्यक्ष चौधरी यहाँके किसानहुक्रे कटैनी ओ मोहना लडियासे ढिउर प्रभावित रहल ओरसे उ लडियासे हुइना क्षति न्यूनीकरणके लाग सरकारके ध्यानाकार्षण कराइल रहिट ।
साथे इहे कुँवार ३१ गतेसे हुइल बेमौसमी बर्खाके कारण यहाँके किसानहुक्रनके हजारौं बिघा धानबाली नष्ट हुइल ओरसे किसानन्के लाग तत्काल राहत लगायत अन्य व्यवस्थापन कैना फेन अध्यक्ष चौधरी प्रधानमन्त्री देउवाहे ध्यानाकार्षण कराइल रहिट ।
प्रधानमन्त्री देउवा बाढ पीडित किसानहुक्रनके समस्या बुझ्टी अपने राजधानी पुग्टी किल उ सम्बोधन कैना बटाइल रहिट । बाढी पीडित किसानहुक्रनके समस्या तथा धानबाली क्षतिबारे प्रधानमन्त्री देउवासंगे अर्थमन्त्री जनार्दन शर्मा, पर्यटनमन्त्री प्रेमबहादुर आले, पूर्वमन्त्री एनपि साउद, बीर बहादुर बलायर, प्रदेश सभासदस्य बिरमान चौधरी, गाउँपालिका उपाध्यक्ष लक्ष्मी सत्गौंवा, कांग्रेस नेता खेमराज चौधरी, राजसमझ चौधरी लगायत उपस्थिति रहल रहे ।
