अभिन घर लौटे नैसेक्लैं बाढ पीडित

पहुरा समाचारदाता
टीकापुर, ६ कार्तिक । टीकापुर नगरपालिका–८ पुदालटोलके ६९ वर्षीया नन्दकला विश्वकर्मा विगत पाँच दिनसे सूर्यपुरस्थित राष्ट्रिय प्राविके भवनमे बैठल बाटी । उहाँ कर्णाली लडियाके बाढसे घर पुहाइलपाछे आश्रय खोज्टी विद्यालय भवनमे पुगल हुइटी ।

बाढसे घर पुहाइलपाछे उहाँ गाउँ जाइ सेकल नैहुइटी । उहाँ किल नैहोके, पुदालटोलके १२ घरपरिवार समेत उहे विद्यालयमे बैठ्टी आइल बाटै । उहाँहुक्रन मध्ये सबके घर बाढ पुहाडेले बा । तत्काल घर जाइ सेक्ना अवस्था नैहुइलपाछे उहाँहुक्रे विद्यालय भवनमे रात बिटैटी रहल बाटै ।

टीकापुर नगरपालिकाके टमान वडाके ३९५ घरपरिवार अब्बेसम घर जाइ सेकल नैहुइट । उहाँहुक्रन मध्ये ढिउर जैसिन घर बाढसे पुहैले बा । कतिपयके घर भत्कके बैठे सेक्ना अवस्था नैहो । उहाँहुक्रे सक्कु विद्यालय भवन, सुरक्षित आश्रय स्थल ओ नाटनके घरमे बैठ्टी रहल विपद व्यवस्थापन शाखाके प्रमुख निर्मला चौधरी जानकारी डेली ।

बाढके कारण घर गुमुइयामे टीकापुर नगरपालिका भिट्टरके सबसे ढिउर वडा नं. ८ के बासिन्दा रहल बाटै । चौधरीके अनुसार वडा नं. ८ के किल २५० घरपरिवार घर छोडके अन्यत्र बैठ्टी आइल बाटै ।

उहाँहुक्रनमध्ये वनगाउँस्थित सुरक्षित स्थलमे ६०, कर्णाली पुलमे ५८, कालिमाटी स्कुलमे ६०, त्रिभुवन मावि बटनपुरमे ६० ओ राष्ट्रिय प्रावि सूर्यपुरमे १२ घरपरिवार बैठ्टी आइल बाटै ।

ओस्टके वडा नं. १ मे शिवनगर स्कुलमे १२, नयाँ नेपाल स्कुलमे १०, वडा नं. २ मे नाटपाटनके ६, वडा नं. ३ मे सुरक्षित स्थलमे ४०, वडा नं. ५ मे त्रिभुवन मावि मौरानियामे २२, वडा नं. ६ मे नाटपाटनके २५ ओ वडा नं. ७ मे कर्णाली मावि सत्तीमे ३० घरपरिवार बैठ्टी आइल बाटै ।

उहोर जानकी गाउँपालिकामे समेत बाढपाछे ११३ घरपरिवार घर जाइ सेकल नैहुइट । ओइने फेन टमान विद्यालय ओ नाटपाटनके घरमे बैठ्टी आइल बाटै । विपद व्यवस्थापन शाखा प्रमुख नेत्र न्यौपानेके अनुसार वडा नं. ३ मे ५० घरपरिवार बालमुक्ति आधारभूत विद्यालय जगतपुरमे बैठ्टी आइल बाटै कलेसे वडा नं. ९ मे ६० ओ वडा नं. ३ मे ३ घरपरिवार नाटपाटनके घरमे बैठ्टी आइल बाटै ।

बाढके कारण विस्थापित हुइलहुक्रनहे राहत वितरणके काम सुरु हुइल बा । उहाँहुक्रनहे तत्काल खाद्यान्न, त्रिपाल, ओढ्ना बिछैना सामाग्री राहत स्वरुप वितरण हुइटी रहल शाखा प्रमुख न्यौपाने जानकारी डेलै । उहाँ रेडक्रसके सहयोगमे बाढ पीडितहे राहत वितरणके काम हुइटी रहल बटैलै ।

टीकापुर नगरपालिकामे समेत वडा कार्यालय मार्फत राहत वितरणके काम हुइटी रहल बा । नगरपालिकासे बाढ पीडित बैठ्टी आइल ठाउँमे पुगके राहत वितरण करटी रहल शाखा प्रमुख चौधरी जानकारी डेली । बाढ पीडितहे टमान संघसंस्था समेत राहत वितरण कैटी आइल बावै ।