कृषि ऋण मिनाहाके माग
पहुरा समाचारदाता
हसुलिया, ६ कार्तिक । कैलालीके कैलारी गाउँपालिका किसानहुक्रनके कृषि ऋण मिनाहा लगागयतके माग सहित प्रधानमन्त्री शेरबहादुर देउवाहे ज्ञापनपत्र बुझाइल बा ।
शुकके बाढ पीडित किसानहुक्रनके पीडा बुझे कैलारी गाउँपालिका वडा नम्बर ७ भुँईयाँफाँटा पुगल प्रधानमन्त्री देउवाहे गाउँपालिका अध्यक्ष लाजुराम चौधरी ज्ञापनपत्र बुझाइल हुइट । टमान बैंक तथा वित्तिय संघसंस्थासे किसानहुक्रे लेहल कृषि ऋण मिनाहा, गाउँपालिकासे स्थापना करल खाद्य बैंकके लाग आवश्यक बजेट विनियोजन, चालू आर्थिक बरसमे हिउँदे बालीमे शत प्रतिशत अनुदान ओ तत्काल राहत प्याकेज लगायतके माग सहित अध्यक्ष चौधरी प्रधानमन्त्री देउवाहे ज्ञापनपत्र बुझाइल रहिट ।
यकर साथे अध्यक्ष चौधरी गैल कुँवार ३१ गतेसे हुइल बेमौसमी बर्षाके कारण हजारौं बिघा धानबाली गुमाइल पीडित किसानहुक्रनके समस्या तथा पीडा प्रधानमन्त्री समक्ष दर्शाइल रहिट । यहाँके किसान कटैनी ओ मोहना लडियासे ढिउर प्रभावित हुइल ओरसे उक्त लडियासे हुइना क्षति नियन्त्रणके लाग अध्यक्ष चौधरी सरकारके ध्यानाकार्षण समेत कराइल रहिट । ज्ञापनपत्र बुझ्टी प्रधानमन्त्री देउवा बाढके समस्या समाधानके लाग दूरगामी योजना लन्ना बटाइल रहिट । सरकार बाढ पीडितके समस्या समाधानके निमित्त चिन्तित रहल बटैटी अपने काठमाडौँ जैटी किल सरकारसे दूरगामी योजनाके बारेम निर्णय ओ सम्बोधन कैना बटाइल रहिट ।
कैलारी गाउँपालिकासे बाढ प्रभावितहुक्रनके लाग ३ करोडके खाद्य बैंक स्थापना करले बा । बाढसे घरेम भित्र्याइ लागल ढिउर मात्रामे धानबालीमे क्षति हुइलपाछे उ गाउँपालिकासे भोकमरीके समस्या आइ नैडेहक लाग खाद्य बैंक स्थापना कैना निर्णय करले बा ।
यकर साथे गाउँपालिकासे चालू आर्थिक बरसमे वडा कार्यालय तथा गाउँपालिका कार्यालयसे सिफारिश डेहल बाफत लेना सिफारिश शुल्क समेत मिनाहा कैना ओ चालू आर्थिक बरसमे हिउँदे बालीमे शत प्रतिशत अनुदान डेना निर्णय करले बा ।
कैलारी गाउँपालिकामे धान बाली नै मुख्य बाली हो । गैल कुँवार ३१ गतेसे हुइल बेमौसमी वर्षासे पूरै गाउँपालिका नै बाढसे नैमजासे प्रभावित हुइल ओ ढिउर मात्रामे धान बालीमे क्षति हुइल बा ।
