पुर्खौली थरके पाछे ‘थारु’ लिख्ना अगुवन्के आग्रह

पहुरा समाचारदाता
धनगढी, ७ कार्तिक । ‘राष्ट्रिय जनगणना २०७८’ मे थारु समुदायहे थरके पाछे ‘थारु’ लिख्ना आग्रह करले बटै ।

थारु कल्याणकारिणी सभा कैलालीके आयोजनामे शनिच्चरके रोज धनगढीमे हुइल ‘राष्ट्रिय जनगणना सचेतना अन्तरक्रिया’ कार्यक्रममे थारु समुदायके जनसंख्याके सही तथ्याङक नानेक लाग जनगणनामे पुर्खौली थरके पाछे थारु शब्द जोरना थारु अगुवाहुक्रे आग्रह करले रहिट ।

पूर्व सांसद कैया थारु विगतमे अपने थारु कल्याणकारिणीसभाके विकासके लाग करल अपने करल प्रयासबारे प्रस्तुत करटी संस्थागत काम करेबेर निस्वार्थ हुके लागे पर्ना बटैलै । थारु छात्राबास ओ थाकसके विकासके लाग अपने सहयोगी दाताके खोजी करके सहयोग कैना विश्वास डेहुवइलै । साथे थाकस जिल्लाके नेतृत्वहे सक्रिय हुके लग्ना अनुरोध समेत करलै ।

थारु समुदायके हकहितके लाग सक्कु जे आ अपन ठाँउमे सहयोग करे सेक्लेसे केल थारु हुइनामे गर्व हुइना पूर्व सांसद थारुके तर्क रहे । २०७८ सालके जनगणनामे थारुहुकनके सहि तथ्यांक नन्ना सक्कु जे आ अपन ठाउँसे सहयोग कैना अनुरोध करलै ।

थारु कल्याणकारिणी सभाके केन्द्रीय सदस्य प्रभातकुमार चौधरी यिहीसे आघेक जनगणनामे ढेर थारु समुदाय अपन थर केल लिखाइल कारण थारुनके जनसंख्या घटल बटैलै । गणकहुकन सही विवरण डेहे छुटैलैसे थारु समुदायके जनसंख्या फेरसे घटे सेक्ना उहाँ बटैलै ।

थारु बुद्धिजीवी तथा अधिवक्ता जोहरीलाल चौधरी २०६८ के जनगणनामे तथ्याङक बङग्याइल कारण थारु समुदायके जनसंख्या घटल बटैलै । आघेक जनगणनामे थारु समुदायके कुल जनसंख्या १७ लाख रहल मने २ लाख मनै थारु भाषा विस्राइल बटैलै । थारु समुदायसे कोटा खाके सांसद बनुइया अपन हकअधिकार विस्राइल अधिवक्ता बटैलै ।

थारु विद्यार्थी समाजके केन्द्रीय अध्यक्ष चन्द्रप्रकाश चौधरी बाहुनबाद सोच रहुइयाहुक्रे थारु ओ रानाथारु समुदायहे लराई खोजल बटैलै । सुदूरपश्चिम प्रदेशमे थारु भाषाहे कामकाजी प्रयोगमे नन्ना घोषणापाछे हुइल विवादहे जोरटी थारु ओ रानाथारु मिल्के जैना बाहेक विल्कप नइरहल बटैलै ।

अधिवक्ता नाथुराम महतो जनगणनामे थरके पाछे थारु शब्द नइजोरलेसे थारु समुदाय कम्जोर डेखैना बटैलै । उहाँ कहलै, थारु समुदायभिटर ढेर थर बा मने जनगणनामे थारु जोरना आवश्यक बा ।

थारु अगुवा तथा जनता समाजवादी पार्टीके जिल्ला अध्यक्ष गयाप्रसाद कुश्मी सही जनसंख्या नानेक लाग थारु कल्याणकारिणी सभा कैलाली अग्रण भूमिका निर्वाह करेपर्नामे जोड डेहल रहिट । थारु छात्रवासके भवन मर्मतके लाग एक दुसरसे हात नइफैलाके एक व्यक्ति, एक रुप्या अभियान चलैलेसे हुई सेक्ना बटैलै ।

थारु बुद्धिजीवी तथा समाजसेवी चन्द्रसिंह चौधरी जनगणनामे सही तथ्याङक नइलिखैलेसे थारु समुदाय फेरसे १० बरसपाछे ढकेल्ना बटैलै । उहाँ कहलै, अब्बेक हरेक ठाउँमे जनसंख्याहे हेरजाइठ, कम जनसंख्या रहल कारण हरेक ठाउँमे कम कोटा निर्धारण करजाइटा, जिहीसे हम्रे पाछे परटी बटी ।

थारु विद्यार्थी समाजके केन्द्रीय उपाध्यक्ष ठाकुरप्रसाद करियाप्रधान जनसंख्यामे थारु समुदाय कम डेखल कारण आरक्षण, सामानुपतिक, सहभागितामे घाटा लागल बटैलै । कार्तिकसे सुरु हुइना जनगणनाके गणकहुकन थारु कल्याणकारिणीसभासे एक ठो प्रशिक्षण देहे पर्ना जरुरी रहल बटैलै । कार्यक्रममे एन्जल कुश्मी थारु समुदायके चेली गैरथारुनसे भोज करलेसेफे जनगणनामे थारु शब्द लिखे पर्ना बटैलै ।

थारु कल्याणकारिणी सभा कैलालीके सभापति लाहुराम चौधरीके अध्यक्षतामे हुइल कार्यक्रममे थाकसके केन्द्रीय सदस्य इन्दु थारु विशिष्ट पहुना रहिट । कार्यक्रममे संचालन थाकसके उपसभापति माधव चौधरी करले रहिट । कार्यक्रममे राष्ट्रिय जनगणना, थारु ओ रानाथारुके भाषा, थारु छात्रवास ओ बाढ पहिरो प्रकोपके विषयमे छलफल हुइल रहे ।