तत्काल राहत ओ पुनर्स्थापना प्याकेज घोषणाके माग
पहुरा समाचारदाता
धनगढी, ७ कार्तिक । सुदूरपश्चिम प्रदेशके टमान कृषक संघ संगठनसे प्रदेश सरकारहे बाढ पहिरो पीडित किसानहुक्रनके लाग तत्काल राहत ओ पुनर्स्थापना प्याकेज घोषणाके लाग अनुरोध करले बाटै ।
अँट्वारके भूमि व्यवस्था, कृषि तथा सहकारी मन्त्री विनिता चौधरीहे टमान माग सहितके ज्ञापनपत्र बुझैटी ओइसीन अनुरोध करल हुइट । कृषि संकटग्रष्त क्षेत्र घोषणा कैके प्राकृतिक विपत्तिसे प्रभावित घरधुरीके यर्थाथ तथ्यांक संकलन, क्षतिपुर्ति तथा किसानहे तत्काल उचित राहत, घाइतेहुक्रनके स्वास्थ्योपचार तथा बसोबास गुमाइ पुगलहुक्रनके लाग उचित बसोबासके व्यवस्था, कृषि पेशा सुरक्षाके लाग बाली ओ पशुधन विमा कार्यक्रम प्रभावकारी बनाइ पर्ना लगायतके माग सहित ज्ञापन पत्र बुझाईल हुइट ।
ज्ञापनपत्र बुझैटी राष्ट्रिय कृषक समूह महासंघ नेपाल सुदूरपश्चिम प्रदेश अध्यक्ष प्रकाश बहादुर थापा बाढ पहिरो पीडित किसानहुक्रनके लाग तत्काल प्रदेश सरकारसे राहत प्याकेज घोषणा करे पर्ना बटाइल रहिट । उहाँ बाढ प्रभावित घरपरिवारमे अब्बेहे नै भोकमरीके अवस्था सृजना होसेकल ओरसे तत्काल उचित राहतके व्यवस्थापन करे पर्नामे जोड डेहल रहिट । यकर साथे उहाँ कृषि पेशा सुरक्षाके लाग बाली ओ पशुधन विमा कार्यक्रमहे प्रभावकारी बनाइ पर्नामे फेन जोड डेहल रहिट ।
गैर सरकारी संस्था महासंघ नेपालके सुदूरपश्चिम प्रदेशके अध्यक्ष देवि प्रसाद खनाल कृषकहुक्रनके लाग हिउँदे बालीके लाग निःशुल्क रुपमे विउविजन लगायत मलखादके फेन सहज रुपमे उपलब्ध कराइ पर्नामे जोड डेहल रहिट ।
ज्ञापनपत्र बुझ्टी मन्त्री चौधरी किसानके लाग राहत प्याकेज, हिउँदे बालीके लाग अनुदानमे बिउविजन लगायत सहज ओ सहुलियत दरमे मलखादके लाग टमान सरोकारवाला निकायसंग छलफल हुइटी रहल जानकारी डेली । साथे कृषक समूहसे राखल टमान मागहे सम्बोधन कैना फेन बटाइल रही ।
राष्ट्रिय कृषक समूह महासंघ नेपाल, खाद्य अधिकार संजाल, केरा उत्पादन तथा प्रबद्र्धन जिल्ला सहकारी कञ्चनपुर, मुख्यमन्त्री नमुन कृषि गाउँ(केरा) कृषक समन्वय समिति कञ्चनपुर, गैसस महासंघ नेपाल, भूमि अधिकार मञ्च कैलाली लगायत कृषि संघ संगठनसे संयुक्त रुपमे ज्ञापनपत्र बुझाइल रहिट ।
गैल कुँवार ३१ गतेसे हुइल बेमौसी बर्षासंगे आइल बाढ पहिरो ओ डुबानसे सुदूरपश्चिम प्रदेश अन्तरगतके ९ जिल्ला प्रत्यक्ष रुपमे प्रभावित हुइल बा । बाढ पहिरोमे परके ३० से ढिउर जाने ज्यान गुमैले बाटै कलेसे २८ जानेसे ण्रि जाने बेपत्ता हुइल बाटै ।
यकर साथे बाढ पहिरोसे दुई हजारसे ढिउर घर डुवान तथा क्षति हुइल बा । कलेसे बाढ पहिरोसे प्रदेशके करिब ३० हजार हेक्टरसे ढिउर जमिनमे लगाईल धानबाली पूर्ण रुपमे क्षति हुइल बा ।
