बाढसे घरवारविहिन अभिन विद्यालयमे बास
पीडित कठै, घर रहुइयाटे लौटजिही हम्रे कहाँ जाब ?
पहुरा समाचारदाता
धनगढी, ८ कार्तिक । जानकी गाउँपालिका–३ मुक्तकमैया बस्तीके चन्टु थारूके घर अब्बे नइहो ।
भर्खर आइल अविरल वर्षाके कारण कर्णाली लडियामे आइल बाढसे बस्ती डुबानमे परलपाछे चौधरीके घर उहे बाढमे मिलल । बाढमे घर गुमाइल चौधरीके घरेम रहल अन्नपात, लुगाकपडासहित सक्कु सम्पत्ति पुहल ।
जीवनभर कमाइल सक्कु पानीमे बगलपाछे चौधरीसहित उहाँ रहल कुछ मुक्तकमैया बालमुक्ति आधारभूत विद्यालयमे बसोबास करटी रहल बटै । विद्यालयमे बैठटी रहल चौधरी लग्गे रहल घरओर लौटके हेरेबेर बहुट रुइठै । ‘घरओर हेरठु, घर नइहो, दुःख करके जोरल सक्कु सामान पुहल, उहाँ कहठै, ‘छ दिन हुइल विद्यालयमे बैठल । यैसिक बैठके कति दिन टरी । घर बचलहुक्रे घर सफा करे लागल बटै । स्थानीय सरकारसे राहत डेना कहले बा । घर रहुइया टे लौटही, हम्रे कहाँ जैबी ?’
कैलालीमे कार्तिक २ गते आइल बेमौसमी बाढमे घर मिललहुक्रे यी बेला बाढपीडिट टमान विद्यालयमे आश्रय लेके बैठल बटै । कलेसे ढेरहे घरबारविहीन बनैले बा ।
कैलालीमे बाढके कारण हजारौँ घर डुबानमे परल बटै कलेसे सयौँ परिवार घर गुमैले बटै । विद्यालयमे आश्रय लेके बैठलहुक्रे घर कब लौटना, के घर बनाडेना कना अन्योलमे बटै ।
चन्टुजस्टे सुस्मिता थारूके घरफे बाढसे भत्काके पूर्णरूपमे नष्ट हुइल बा । उहाँ फे घर नइरहलपाछे आब कहाँ बैठना कना चिन्तामे बटै । ‘आँखी आघे बाढसे सक्कु पुहगाइल, घरभिटरके कुछ सामानफे सारे नइसेक्गिल, सुस्मिता कहली, ‘दैवफे हमार जैसिन गरिबहे विपत्तिमे पारठ । गरिबीमे बाँचल हम्रे अब घरे नइरहलेसे कहाँ बैठबी ?’
बाढसे बस्तीमे १८ परिवारके घर नइरहल । उ परिवार आँखी आघे घर बाढमे मिलल हेरटी रहलै मने अपन कुछ सामानफे जोगाई नइपैलै । यैसिक विद्यालयमे बैठल सयौँ नागरिकहे पालिकासे साँझ बिहान दुई छाक खाना खवैटी रहल बटै । जिल्लामे बाढके कारण सयौँ परिवारसे घर गुमैले बटै कलेसे हजारौँ परिवार विस्थापित हुइल बटै ।
टीकापुर, भजनी नगरपालिका ओ जानकी गाउँपालिकाके उच्च स्थानमे रहल विद्यालय यी बेला बाढ प्रभावितसे भरल बटै । पालिका ओ संघसंस्थासे सहकार्य करके विद्यालयमे आश्रय लेटी रहलहुकनके खाना खवैटी रहल बटै । टीकापुरमे सयौँ परिवार विद्यालयमे बैठटी रहल बटै ।
टीकापुरके तटीय क्षेत्र वडा नं ८ मे बाढसे ढेर क्षति पुगैले बटै । वडा नं ८ पूरे प्रभावित हुइल ओरसे उहाँक विस्थापित परिवारहे राहत तथा उद्धारके कार्यमे पालिका जुटल विपद् व्यवस्थापन शाखाके प्रमुख निर्मला चौधरी बटैली । ‘हम्रे विपद् व्यवस्थापन समितिके बैठक बैठके मापदण्ड बनाके राहतके कार्यक्रम नन्टी बटी, उहाँ कहलै, ‘बाढसे भारी क्षति पुगाइल ओरसे राहत तथा उद्धारके कार्यमे सक्कु जे मिलके काम सुरु करल बा ।’
संघसंस्थाके सहयोगमे पानी, चिउरा ओ चाउचाउ वितरण हुइटी रहल बा । जानकी गाउँपालिकाके अध्यक्ष प्रदीपकुमार चौधरी पालिकासे तथ्याङक संकलन ओ क्षतिके विवरण संकलन करटी रहल ओरसे कुछ दिनमे राहतके कार्यक्रम नन्ना बटैलै । ‘सरकार साथमे बा भुखे कोई बैठे नपरे कहिके काम करटी रहल बटी, उहाँ कहलै, ‘हम्रे सहयोगी संघसंस्थाहे समेत सहकार्य कैना आग्रह करले बटी । क्षति हेरके सहयोग हुई ।’
