राष्ट्रियसभाके चुनाव माघ पहिल साता चुनाव कैना आयोगके सिफारिस
२० सदस्यके पद खाली हुइटी
काठमाडौं, ८ कार्तिक । निर्वाचन आयोगसे राष्ट्रियसभाके रिक्त २० पदमे अइना माघ पहिल साता निर्वाचन कैना सिफारिस करले बा । प्रधानमन्त्री शेरबहादुर देउवासंग सोम्मार हुइल भेटमे आयोगसे फागुन पहिल साता रिक्त २० सदस्यके निर्वाचन कैना सरकारसमक्ष सिफारिस करल हो । २० सदस्यके पदावदी अइना फागुनमे ओरैटी बा ।
संविधानके धारा ८६(३) ओ राष्ट्रियसभा नियमावली, २०७५ के नियम २०८ के व्यवस्थाअनुसार फागुनसे २० राष्ट्रियसभा सदस्यके पदावधि सेक्ना हुइलपाछे आयोग नयाँ चुनाव सिफारिस करल हो । आयोगके अनुसार चन्द्रबहादुर खड्काके स्थानमे गैल जेठ १७ गते हुइल उपनिर्वाचनसे दृग नारायण पाण्डेय निर्वाचित हुइलमे उहाँक कार्यकालफे फागुन २० सम केल कायम हुई ।
ओस्टेक प्रदेशके १८ ओ प्रतिनिधिसभाके ४ सांसदकेफे पद रिक्त, रहल अओरसे उ पदमे उपनिर्वाचन कैनाबारेफे छलफल हुइल प्रमुख निर्वाचन आयुक्त दिनेशकुमार थपलिया जानकारी डेलै । आयोगके अनुसार एमालेके ८, माओवादी केन्द्रका ४, नेकपा एकीकृत समाजवादीके ४, काँग्रेसके ३ ओ मनोनित एक सदस्यके पदावधि फागुन २० मे ओरैटी बा ।
राष्ट्रियसभाके कार्यकाल सेक्ना ३५ दिनआघे चुनाव करे पर्ना व्यवस्था हुइल ओरसे आयोगसे माघ पहिल साताके लाग चुनावके मिति प्रस्ताव करल हो ।
