राष्ट्रिय सौन्दर्यकर्मी यूनियनके प्रदेश अधिवेशन
पहुरा समाचारदाता
धनगढी, ११ कार्तिक । सुरक्षित र मर्यादित रोजगार, सौन्दर्यकर्मीहरुको अधिकार सहितको मूल नाराके साथ राष्ट्रिय सौन्दर्यकर्मी यूनियन नेपाल सुदूरपश्चिम प्रदेशके अधिवेशन सम्पन्न हुइल बा ।
अधिवेशनसे सौन्दर्यकर्मीहुकनके पेशाहे मर्यादित बनैना प्रदेशभरके सौन्दर्यकर्मीहुकनहे एकताबद्ध करके संगठन निर्माण करे लागल जनाइल बा । सौन्दर्यकर्मीहुक्रे छोट लगानीसे अपने श्रममे शुरुवाट करटी रहल व्यापारहे व्यवस्थित ओ सम्मानजनक बनैनाके साथे पेशागत सुरक्षाके लाग अवाज उठैना संगठित हुइटी रहल केन्द्रीय सदस्य तथा सुप इन्चार्ज सृर्जना जोशी बटैली ।
राष्ट्रिय सौन्दर्यकर्मी यूनियन नेपाल ट्रेड यूनियनमे आवद्ध हुइल संस्था हो । टबमारे सौन्दर्य पेशामे आवद्ध रहल सक्कु सौन्दर्यकर्मीहुकनके आवाज मजबुद बनैना संगठन आवश्यक रहल जोशी बटैली । ओस्टेक कार्यक्रमके वडका पहुना जिफन्टके केन्द्रीय सदस्य तथा प्रदेश अध्यक्ष देवबहादुर बम संगठनसे सौन्र्दयकर्मीहुक्रे व्यापार सञ्चालन करेबेर सरकारसे पैना सर्वसुलभ कर्जाके लाग पहँुच अभिवृद्धि कैना मद्दत पुग्न बटैलै ।
उहाँ राष्ट्रिय सौन्दर्यकर्मी यूनियनमे आवद्ध सक्कु सदस्य सहकारी, ट्रेडयूनियन लगायत संस्थामे फे आवद्ध हुई सेक्लेसे व्यक्तिगत जीवनमे फाईदा पुग्न बटैलै । अबिधेशनसे अध्यक्षमे शोभा रावल, उपाध्यक्ष कमला गुरुङ, सचिवमे सपना रोकाया, सहसचिव आशा चौधरी, सदस्यमे गीता पौडेल विष्णुमाया आर्याल, लक्ष्मी भट्ट, विष्णदेवी विष्ट, निकिता विष्ट, सलता कुश्मी, सरिता चौधरी, रिता चौधरी चयन हुइल बटै ।
कार्यक्रममे नेपाल यातायात स्वतन्त्र मजदुर संगठनके सुदूरपश्चिम अध्यक्ष ललित चन्द, नेपाल अटोमेकानिक्स ट्रेड यूनियनके सुप अध्यक्ष चन्द्र प्रकाश गैरे, सौन्दर्यकर्मी नेपालके केन्द्रीय सदस्य गंगा नगर्मी, ट्रेड यूनियन महासंघके केन्द्रीय सदस्य राजकुमारी चौधरी, सल्लाहकार झुम अधिकारी लगायत शुभकामना मन्तव्य व्यक्त करले रहिट ।
