किसानहे राहत डेना सरकारके निर्णय
१० कठ्ठासे कमहे ६५ प्रतिशत, १० कठ्ठासे ३ विघासमहे ३० प्रतिशत ओ ३ विघासे ढेरहे २० प्रतिशत राहत डेना
पहुरा समाचारदाता
धनगढी, १२ कार्तिक । यिहे कुवाँर ३१ से कार्तिक ३ गतेसम बरसल बेमौसमी पानीसे बाढ, पहिरो ओ डुवान हुके धानबालीमे क्षति व्यहोरल किसानहे सरकारसे क्षतिके ६५ प्रतिशतसम राहत डेना निर्णय करले बा । कृषि तथा पशुपंक्षी विकास मन्त्रालयके प्रारम्भिक विवरण अनुसार देशके सातु प्रदेशमे आठ अर्व २६ करोड ८० लाख रुपैँया ढेरके धानबाली क्षति हुइल हुइल बा ।
विफेक रोज बैठल मन्त्रिपरिषद बैठकसे १० कठ्ठासे कम जग्गा रहल किसानहे क्षतिके ६५ प्रतिशतसम राहत डेना निर्णय करल स्वास्थ्य तथा जनसंख्या मन्त्री विरोध खतिवडा जानकारी डेलै ।
ओस्टेक १० कठ्ठासे ३ विघासम जग्गा रहल किसानहे क्षतिके ३० प्रतिशतसम ओ ३ विघासे ढेर जग्गा रहल किसानहे क्षतिके २० प्रतिशत राहत डेना निर्णय हुइल उहाँ बटैलै ।
कार्तिक १ से वर्षा, बाढ ओ डुवानके कारण देशके ढेर ठाउँमे पाकल धानबाली डुवानमे परल रहे । धानबालीमे हुइल क्षतिबारे अध्ययन कैना सरकारसे गृह मन्त्रालयके सचिव टेकनारायण पाण्डेके संयोजकत्वमे समिति गठन करल रहे ।
सरकारके प्रवक्ता सञ्चार तथा सूचना प्रविधिमन्त्री ज्ञानेन्द्रबहादुर कार्कीके अनुसार धानके न्युनतम समर्थन मूल्य कायम करेबेर निर्धारण हुइल उत्पादन लागतके आधारमे किसानसे राहत पैही ।
किसानहे राहत वितरणके लाग प्रधानमन्त्री तथा मन्त्रिपरिषद कार्यालयके सचिवके संयोजकत्वमे कार्यदल बनैना ओ उ कार्यदलसे ५ दिनभिटर कार्यविधि बनाके पेश कैना निर्णयफे मन्त्रिपरिषद बैठकसे करले बा ।
बर्षाके कारण ८५ हजार ५८० हेक्टर क्षेत्रफलमे क्षति पुगल बा कलेसे दुई लाख ८५ हजार ५०९ हेक्टर क्षेत्रफलमे असर परल बा । जेकर कारण तीन लाख २५ हजार २५८ मेट्रिक टन धान नष्ट हुइल मन्त्रालयके प्रवक्ता प्रकाशकुमार सञ्जेल बटैलै ।
सुदूरपश्चिमके कैलाली ओ कञ्चनपुर दुई जिल्लामे १८ हजार हेक्टर क्षेत्रफलमे लगाइल धानमे क्षति पुगल बा । प्रदेशभर एक अर्ब ९१ करोड रुप्यासे ढेर मुल्यके ६८ हजार चार सय मेट्रिकटन धानमे बर्षासे क्षति पुगैले बा ।
प्रदेश १ के झापा, मोरङ् ओ सुनसरी तीन जिल्लामे सात हजार ४९२ हेक्टर क्षेत्रफलमे लगाइल धानमे क्षति पुगल बा । प्रदेशभर ८० करोड रुप्या ढेरके २८ हजार ४६९ मेट्रिक टन धानमे बर्षासे क्षति पुगाइल मन्त्रालय जनैले बा ।
प्रदेश २ के सप्तरी, सिराहा ओ सर्लाही तीन जिल्लामे पाँच हजार ३५५ हेक्टर क्षेत्रफलमे लगाइल धानमे क्षति पुगल बा । प्रदेशभर ५६ करोड रुप्या ढेरके २० हजार ३५० मेट्रिक टन धानमे बर्षासे क्षति पुगैले बा ।
बागमती प्रदेशके चितवन ओ नुवाकोट दुई जिल्लामे ५३० हेक्टर क्षेत्रफलमे लगाइल धानमे क्षति पुगल बा । प्रदेशभर ५ करोड ८० लाख ढेरके दुई हजार ६८ मेट्रिकटन धानमे बर्षासे क्षति पुगैले बा ।
ओस्टेक गण्डकी प्रदेशके स्याङ्जा, कास्की ओ पूर्वि नवलपरासी तीन जिल्लामे एक हजार १९२ हेक्टर क्षेत्रफलमे लगाइल धानमे क्षति पुगल बा । प्रदेशभर १३ करोड ढेरके चार हजार ५३० मेट्रिकटन धानमे बर्षासे क्षति पुगैले बा । लुम्बिनी प्रदेशके बाँके, बर्दिया, कपिलबस्तु ओ रुपन्देही चार जिल्लामे ४२ हजार ४२७ हेक्टर क्षेत्रफलमे लगाइल धानमे क्षति पुगल बा ।
प्रदेशभर चार अर्व ५१ करोड ढेरके एक लाख ६१ हजार ४२३ मेट्रिकटन धानमे बर्षासे क्षति पुगैले बा । कर्णली प्रदेशके डोल्पा, जुम्ला, सल्यान ओ सुर्खेत चार जिल्लामे १० हजार ५८४ हेक्टर क्षेत्रफलमे लगाइल धानबालीमे क्षति पुगल बा । प्रदेशभर ३० करोड ढेरके ४० हजार २१९ मेट्रिकटन धानमे क्षति पुगैले बा ।
