सेती प्रादेशिक अस्पतालहे भेन्टिलेटर प्रदान
पहुरा समाचारदाता
धनगढी, १२ कार्तिक । कोरोना भाइरस संक्रमितके उपचारमे सहयोग पुगाइक लाग स्वास्थ्य, वातावरण ओ जलवायु कार्य फाउण्डेशन (हेक्याफ)से सेती प्रादेशिक अस्पतालहे पाँच थान भेन्टिलेर निःशुल्क उपलब्ध करैले बा ।
बिफेक रोज आयोजित कार्यक्रममे ‘हेक्याफ’के निर्देशक श्रीरामसिंह बस्नेत अस्पतालके मेडिकल सुपरिटेन्डेन्ट डा हेमराज पाण्डेयलहे उ भेन्टिलेटर हस्तान्तरण करल रहिट । मेसु डा पाण्डेय स्तरीय भेन्टिलेटर ढिउर परिमाणमे अस्पतालहे पहिलचो सहयोग प्राप्त हुइल बटैटी उक्त संस्थाप्रति आभार व्यक्त करलै । उहाँ कहलै, “कोभिड–१९ के महामारीसे हम्रहीनहे बरवार पाठ सिकैले बा, स्तरीय खालके भेन्टिलेटर पाके उपचारमे कुछ सहज हुइना बा ।”
निर्देशक बस्नेत कोभिड–१९ के महामारीपाछे नेपाल सरकारसे सहयोगके लाग विश्वव्यापी रुपमे करल आग्रहबमोजिम हेक्याफके पहलमे सेवामूलक अन्तर्राष्ट्रिय गैरसरकारी संस्था चुजी फाउण्डेशनसे भेन्टिलेटर प्राप्त हुइल बटैलै । “टिसरा लहरके कोरोना भाइरस फैलल् पाछे बालबालिकाहे ढिउर असर पारे सेक्ना कहल बा”, उहाँ कहलै । “दातृ निकायसँग समन्वय कैके उपलब्ध कराइल भेन्टिलेटर बालबालिकासहित सक्कु उमेर समूहके नागरिकके उपचारमे प्रयोग करे मिल्ना कहल बा ।”
हेक्याफसे स्वास्थ्य सेवा विभागसँग समन्वय कैके देशभरके टमान अस्पतालमे जम्मा २६५ थान इ मेरके भेन्टिलेटर उपलब्ध कराइ लागल बा । प्रतिगोटा इ भेन्टिलेटरके बजार मूल्य झण्डै रु २२ लाख पर्ना बटाइल बा । तीन दिनआछे कञ्चनपुरके महाकाली अस्पतालमे दुई थान भेन्टिलेटर उपलब्ध कराइल उक्त संस्थासे इहीसे आघे फेन टमान अस्पतालहे अक्सिजन कन्सन्ट्रेटरलगायत स्वास्थ्य सामग्री फेन उपलब्ध कराइल रहे । उ उपकरण सञ्चालनके लाग दक्ष जनशक्तिके अभाव होके समस्या हुइटी रहल बटाइल बा । सुदूरपश्चिम प्रदेशके ढिउर अस्पतालमे इ मेरके समस्या झेले परल बा ।
मेसु डा पाण्डेय कहलै, “कोरोनाके समस्यापाछे अस्पतालमे बिरामीके उपचारके लाग इ मेरके उपकरण प्राप्त हुइटी रहलेसे फेन दक्ष जनशक्ति नैहोके छोट छोट समस्यासे ओस्टहे उपकरण थन्क्याके राखे पर्ना समस्या रहल बा ।”
