सुदूरपश्चिममे थप १७ मे कोरोना पुष्टि
पहुरा समाचादाता
धनगढी, १२ कार्तिक । सुदूरपश्चिम प्रदेशमे पछिल्का २४ घण्टामे ठप १७ जनहनमे कोरोना संक्रमण पुष्टि हुइल बा ।
सामाजिक विकास मन्त्रालय स्वास्थ्य निर्देशनालयसे डेहल जानकारी अनुसार एन्टिजेनके ९८८ मन्से १० जाने ओ आरटी पिसिआरके ६७ मन्से ७ जनहनमे कोरोना पोजेटिभ डेखल हो । कलेसे ७ जाने ठिक ह्ुइल बाटै ।
ओस्टेक सेती प्रादेशिक अस्पतालके प्रयोगशालामे पछिल्का २४ घण्टामे हुइल परिक्षणमे थप ६ जनहनमे कोरोना पुष्टि हुइल बा । कलेसे ३ जाने संक्रमित चोखाके अस्पतालसे डिस्चार्ज हुइल बाटै । हाल अस्पतालमे १२ जाने संक्रमितके उपचार हुइटी बा ।
नेपालमे थप ४९० जाने संक्रमित, ५६९ डिस्चार्ज
बिटल २४ घण्टामे नेपालमे ४९० जाने कोरोना संक्रमित थपल बटैं । ७ हजार १४५ जहनमे पीसीआर परीक्षणमे ४९० जहनमे कोरोना पोजिटिभ डेखाइल स्वास्थ्य तथा जनसंख्या मन्त्रालय शुकके रोज जनैले बा ।
अस्टेक, २ हजार ६०१ जहनमे एन्टिजेन परीक्षणमे ५९ जहनमे संक्रमण डेखाइल बा । थपल नयाँ संक्रमितसँगे नेपालमे कोरोना संक्रमितके संख्या ८ लाख ११ हजार ८९७ पुगल बा ।
२४ घण्टामे ५६९ जाने कोरोनामुक्त हुइल बटैं । हालसम नेपालमे कोरोनामुक्त हुइनाके संख्या ७ लाख ९० हजार ३५८ पुगल बा । मन्त्रालय नेपालमे हालसम कोरोनासे मृत्यु हुइनाके संख्या ११ हजार ३८८ पुगल जनैले बा । २४ घण्टामे थप ६ जहनमे मृत्यु हुइल बा ।
देशभर १० हजार १५१ सक्रिय संक्रमित रहल ओ २१२ जाने क्वारेन्टाइनमे रहल मन्त्रालय जनैले बा । हालसम ४४ लाख ९ हजार ७२७ पीसीआर परीक्षण हुइल बा ।
