राजीनामा डेना प्रधानन्यायाधीश जबराहे बारके ५ डेना अल्टिमेटम

काठमाडौं, १२ कार्तिक । नेपाल बार एशोसिएसनसे राजीनामा डेना प्रधानन्यायाधीश चोलेन्द्रशम्शेर जबराहे ५ दिने अल्टिमेटम डेहल बा । साथे बारसे दबावमुलक आन्दोलनके कार्यक्रम समेत घोषणा करले बा ।

शुकके बैठल बार कार्यसमितिके बैठकसे अँटवारसे बुधबारसम करिया पट्टी बाँधके सर्वोच्च अदालतमे विरोध कार्यक्रम कैना निर्णय करले बा । उ आन्दोलनमे सक्रिय सहभागिता जनैना उपत्यकाके कानून व्यवसायीहुकनहे आह्वान करल उपाध्यक्ष रक्षा बस्याल जानकारी डेली ।

उपाध्यक्ष बस्याल कहली, ‘यी आन्दोलनके अवधिभरमे फे राजीनामा नइअइलेसे विरोधके थप कार्यक्रम घोषणा कैबी ।’

विकृति, विसंगति, भ्रष्टाचार रोके नइसेकल, न्यायपालिकाके गरिमा कायम करे नइसेकल ओरसे राजीनामा मागल कहटी बारसे सर्वोच्चके इजलासमे बैठके आदेश वा फैसला नइकैना माग करले बा ।