२१३ जाने अपाङगता रहल व्यक्ति पैलैं घर दैलोमे खोप
पहुरा समाचरदाता
धनगढी, १४ कार्तिक । कैलालीके गौरीगंगा नगरपालिका–११ मे संचालन हुइल पुर्णअशक्त ओ अतिअशक्त अपाङगता रहल नागरिकहुकनके घर दैलोमे जाके कोरोना विरुद्धके खोप, सहायक सामग्री नापजाँच अभियानमे २१३ जाने अपाङगता रहल व्यक्ति खोप सेवा पैले बटै ।
कर्डएड, लुथरन विश्व फेडरेसन नेपाल, दिगो विकास समाज भजनी ओ सर्वाङिण अपाङगता विकास समाज नेपालके सयुक्त साझेदारी, गौरीगंगा नगरपालिका स्वास्थ्य शाखाके समन्वयमे हुइल अभियानमे २१३ जाने अपाङगता रहल व्यक्ति खोप सेवा पाइल अपाङगता अधिकारकर्मी अभियन्ता नन्दराज भट्ट बटैलै ।
पुर्णअशक्त ओ अतिअशक्त अपाङगता रहल नागरिकहुकनके घर दैलोमे पुगके पाँच दिनसम वडामे निरन्तर अभियान संचालन हुइलपाछे अपाङगता रहल नागरिक, एकल महिला ओ जेष्ठ नागरिक लाभान्वित हुइल उहाँ जनैलै ।
उ खोप अभियान कार्तिक १० गते गौरीगंग नगरपालिका कार्यालय स्वास्थ्य शाखा प्रमुख उमेश भट्ट, महिला तथा बालबालिका शाखा प्रमुख भावना जोशी ओ सर्वाङिण अपाङगता विकास समाज नेपालके कार्यकारी निर्देशक नन्दराज भट्टसे सुरुवात करल रहिट । कलेसे कोरोना विरुद्धके खोप, सहायक सामग्री नापजाँच अभियान समापन नगरपालिकाका उप–सचिव हरिश पन्त करले रहिट । उहाँ यी अभियान सफलता पुर्वक सम्पन्न हुइल ओ यी कार्यक्रम नेपालके लाग नमूना कार्यक्रम रहल बटैले बटै ।
सामाजिक उत्तरदायित्व बहन कैना यैसिन कार्यक्रम नगरपालिकामे नानके सहयोग करल कहटी उहाँ कर्डएड, लुथरन विश्व फेडरेसन नेपाल, दिगो विकास समाज भजनी ओ सर्वाङिण अपाङगता विकास समाज नेपालहे धन्यवादफे डेहल रहिट ।
असहायहुकनके लाग नानल सामाजिक सेवाके महान तथा अनुक्रणिय कार्यक्रमके लाग नगरपालिका परिवार सदा तत्पर ओ सहयोगी भुमिकामे रहना प्रतिवद्धताफे व्यक्त करलै ।
