खाद्यसे पहिल त्रैमासिक प्रगति सार्वजानिक

पहुरा समाचारदाता
धनगढी, १६ कार्तिक । खाद्य प्रविधि तथा गुण नियन्त्रण कार्यालय कैलालीसे आर्थिक बर्ष २०७८÷०७९ के पहिल त्रैमासिक प्रगति सार्वजनिक करले बा ।

खाद्य स्वच्छता तथा गुणस्तर नियमन, दाना स्वच्छता तथा गुणस्तर नियमन, खाद्य तथा दाना नमूना विश्लेषण, खाद्य प्रविधि विकास तथा खाद्य पोषण कार्यक्रम करटी खाद्य प्रविधि तथा गुण नियन्त्रण कार्यालय कैलालीसे पहिल त्रैमासिक प्रगति सार्वजनिक करल हो ।

त्रैमासिक प्रगति सार्वजनिक करटी वरिष्ठ खाद्य अनुसन्धान अधिकृत नवराज दाहाल आर्थिक बर्ष २०७८÷०७९ के पहिल त्रैमासिकमे सुदूरपश्चिम प्रदेशमे ५२ ठो टमान गुणस्तरहिन वस्तुके ५२ ठो मुद्दा प्रक्रियामे रहल ओ एक ठो भर खाद्य ऐन बमोजिम मुद्दा दायर हुइल बटैलै ।

पहिल चौमासिकमे लक्ष्य अनुसार प्रगति हुइल उहाँ बटैलै । प्रशोधित पिना पानीके गुणस्तर तथा स्वच्छता अभिवृद्धिके लाग व्यावसायीसंग अन्तरक्रिया बर्षमे २ चो लक्ष्य रहलमे एक चो करके सय प्रतिशत, खाद्य नमुना विश्लेषण वार्षिक लक्ष्य १५ सय रहलमे ५४८ करके सय प्रतिशत पुरा करल ओ दाना नमुना विश्लेषण वार्षिक ८० रहलमे १९ करके ९५ प्रतिशत पुरा करल वरिष्ठ खाद्य अनुसन्धान अधिकृत दाहाल बटैलै ।

कतिपय ठाउँमे पर्वके बेला उपभोग्य मिति सेकल, विना लेवलिङ लगायत सरसामान बजारमे विक्री हुइटी रहल ओरसे उपभोक्ता सचेत हुइ पर्ना उहाँ बटैलै । टिहारके वेला उपभोक्ताहुक्रे हतारमे यात्रा कैना एवं खाद्य तथा पेय पदार्थके अत्याधिक खपत हुइना ओरसे स्वच्छता ओ गुणस्तरमे और बेलासेफे सचेत हुइना उहाँ आग्रह करलै । उपभोक्ताहुकन खुला रुपमे विक्री हुइना खाद्य बस्तुके हकमे स्पष्ट रुपमे आँखीसे विल्गैना करके सरल गलल, किरा, ढुसी नइलागल चिज हेरके खाई पर्ना, रंग दारके बनाइल चिज नइखैना, मासुजन्य चिज सफासे ढोके मजासे पकाके खाई पर्ना वरिष्ठ खाद्य अनुसन्धान अधिकृत दाहाल बटैलै ।

उपभोक्ता हकहित मञ्च प्रदेश सचिव भोजराज जोशी उपभोक्ता सचेत हुइलेसे गुणस्तरहिन, म्याद गुजरल वस्तु विक्री वितरणमे कमी अइना बटैलै । कार्यक्रमके संचालन खाद्य अनुसन्धान अधिकृत सरोज पौडैले करले रहिट ।