स्मृति दिवसमे मानवसेवा आश्रमहे सहयोग
पहुरा समाचारदाता
धनगढी, १५ कार्तिक । चन्द्र पशुपति रैका स्मृति प्रतिष्ठानके आयोजनामे सोम्मारके रोज धनगढीमे राष्ट्रि«यता लोकतन्त्र ओ समरुपतावाद प्रति समर्पित, दलित मुक्ति आन्दोलनके अगुवा योद्धा एवं समरुपतावादी नेता स्वर्गीय चन्द्रबहादुर रैकाके १६ औँ स्मृति दिवस विविध कार्यक्रम हुइल बा ।
उ अवसरमे धनगढीस्थित मानव सेवा आश्रममे रहल ७० जाने साहारा विहिनहुकनके लाग नगद ५ हजार, दिवा खाना ओ खाद्य तथा पोषण सामग्री सहयोग करल बा । सहयोग सामग्रीमे २५ केजी चाउर, तेल ५ लिटर, दाल ५ केजी, भुजा १० प्याकेट, चिउरा ६ प्याकेट, पिठो १० केजी, आलु १० केजी, चाउचाउ १ पेटी, नुन २ प्याकेट, मास्क २ प्याकेट, सोयाविन ६ प्याकेटलगायतके खाद्य सामग्री रहल बा ।
उ सामग्री कार्यक्रमके प्रमुख अतिथि सुदूरपश्चिम प्रदेश सभा सदस्य टेकबहादुर रैका मानव सेवा आश्रमके प्रमुख संरक्षक सिद्धराज पनेरुहे हस्तान्तरण करले रहैं ।
कार्यक्रममे प्रदेश सभा सदस्य रैका स्वर्गीय चन्द्रबहादुर रैका शोषित, पीडित जनताके लाग एक सच्चा क्रान्तिकारी योद्धा रहल बटैटि उहाँप्रति भावपूर्ण श्रद्धाञ्जली अर्पण करैं ।
कार्यक्रममे नेपाली काँग्रेसके नृपबहादुर सुनार स्वर्गीय रैका एक देशभक्त ईमान्दार ओ दलित एवं सीमान्तकृत वर्ग समुदायके लाग संघर्षशील नेता रहल बटैलैं ।
ओस्टेक, कार्यक्रममे नेकपा माओवादी केन्द्रेक तिलकबहादुर सिहं, नेकपा (एकीकृत समाजवादी)के चक्र विक, नेपाल दलित संघके केन्द्रीय उपाध्यक्ष छत्रबहादुर टेलर, दलित गैरसरकारी संस्था महासंघके संयोजक खडक विक, धनगढी उपमहानगरपालिका वडा नम्बर २ के वडा सदस्य रत्ना विष्ट, वडा नम्बर ५ के सदस्य माया ताम्राकार, मानव सेवा आश्रमका प्रमुख संरक्षक पनेरु लगायत मन्तव्य व्यक्त करले रहैं ।
चन्द्र पशुपति रैका स्मृति प्रतिष्ठानके अध्यक्ष प्रेम विकके अध्यक्षतामे हुइल कार्यक्रमके सञ्चालन प्रतिष्ठानके सचिव राजेन्द्र रैका करले रहैं ।
