खुकुरी प्रहार करके युवकके हत्या आरोपमे ८ जाने पक्राउ
पहुरा समाचारदाता
धनगढी, २४ कार्तिक । खुकुरी प्रहार करके युवकके हत्या आरोपमे ८ जाने पक्राउ परल बटै ।
यिहेक कार्तिक २३ गते रात पौने ९ बजेक समयमे जिल्ला कैलाली टिकापुर नगरपालिका वडा नं.१ स्थित सिद्वार्थ होटल लग्गे लम्कीचुहा नगरपालिका वडान. १ लम्की चौराह लग्गे बैठना बर्ष २३ के भुपेन्द्र बडुवालहे धरियार हतियार प्रहार करके घाहिल अवस्थामे छोरल रहे ।
खबर प्राप्त हुइटी की ईलाका प्रहरी कार्यालय टिकापुरसे प्रहरी नायव उपरीक्षक प्रकास सापकोटाके कमाण्डमे प्रहरी टोली घटनास्थलमे परिचालित हुके घाहिल भुपेन्द्र बडुवालहे उपचारके लाग टिकापुर अस्पतालमे पठाईलमे उपचारके क्रममे हुकान साढे नौ बजेक समयमे टिकापुर अस्पतालमे मृत्यु हुइल रहे ।
घट्नास्थलसे सु.प.प्र.०१००८ प ५५६५ नं. के करिया रङके होन्डा कम्पनीके स्कुटी नियन्त्रणमे लेके हतियार प्रहार करके फरार रहल व्यक्तिहुकनके खोजतलास तथा थप अनुसन्धानके लाग सुदुरपश्चिम प्रदेश प्रहरी कार्यालय तथा जिल्ला प्रहरी कार्यालय कैलालीसे विशेष अनुसन्धान टोली परिचालन करल प्रहरी प्रवक्ता प्रतिक जनैलै ।
उ टोली हत्यामे संलग्न जिल्ला कैलाली लम्की चुहा नगरपालिका वडा नम्बर ३ बैठना बर्ष २० के आर्यन देवकोटा, बर्ष २४ के महेश रावल, बर्ष २० के धिरज शाही, वडा नम्बर १ बैठना बर्ष १८ के निशान मल्ल, बर्ष २२ के कपिल श्रेष्ठ, टिकापुर नगरपालिका वडा नं. १ बैठना बर्ष २२ के प्रबिन रिमाल, बर्ष २६ के सोहन शाह, बर्ष २१ के रोहित आलेहे पक्राउ करले बा । प्रवक्ता विष्ट थप अनुसन्धान तथा खोजतलाश कार्य जारी रहल जनैले बटै ।
