अपांगता रहल नागरिक पैलैं घर दैलोमे खोप सेवा

पहुरा समाचारदाता
टीकापुर, २७ कार्तिक । टीकापुर नगरपालिकाके टमान वडामे अपांगता रहल नागरिक हुकनके लाग घर दैलोमे खोप अभियान सुरु करल बा ।

कर्डएड, लुथरन बिश्व फेडरेसन नेपाल, दिगो विकास समाज भजनी ओ सर्वाङिण अपांगता विकास समाज नेपालके सयुक्त साझेदारी, टिकापुर नगरपालिका स्वास्थ्य शाखा,महिला बालबालिका तथा समाज कल्याण उप शाखाके समन्वयमे पुर्ण अशक्त ओ अति अशक्त अपांगता रहल नागरिकहुकनके घर दैलोमे जाके कोरोना विरुद्धके खोप अभियान तथा सहायक सामग्री नापजाँच कैना काम सुरु हुइल बा ।

नगरपालिकाके ९ वडामे सफलता पुर्वक सम्पन्न करके २०० जानेसे ढेरहे सेवा डेना लक्ष्य रहल उ कार्यक्रमके प्राविधिक सहजकर्ता नन्दराज भट्ट जानकारी डेलै । ५ दिन ९ वडामे निरन्तर अभियान संचालन हुइना ओ करिब २५० जाने अपांगता रहल नागरिक, एकल महिला ओ जेष्ठ नागरिक लाभान्वित हुइना उहाँ बटैलै ।

उ खोप अभियान शुकके रोज टीकापुर नगरपालिका कार्यालयके महिला बालबालिका तथा समाज कल्याण उप शाखा प्रमुख संगीता शाह, अस्तुर्नी चौधरी भगवती डगौराथारु, स्वास्थ्य शाखा खोप विभाग प्रमुख कृष्ण बटला ओ सर्वाङिण अपांगता विकास समाज नेपालके कार्यकारी निर्देशक नन्दराज भट्टसे सुरुवात करल रहिट ।

कार्यक्रममे नगरपालिकाके प्रमुख प्रशासकीय अधिकृत दमनसिंह चौधरी यी कार्यक्रम नेपालके लाग नमूना कार्यक्रम रहल बटैलै । यैसिक यी कार्यक्रमहे यी नगरपालिकामे नन्ना सस्थाहे हार्दिक धन्यवादसहित नगरपालिकाके ओरसे यैसिन महान तथा अनुक्रणिय कार्यक्रम रहल बटैलै ।