सहिदके नाउमे व्यापारः विप्लव
पहुरा समाचारदाता
धनगढी, २७ कार्तिक । नेपाल कम्युनिष्ट पार्टीके महासचिव नेत्रविक्रम चन्द ‘विप्लव’ सहिदके नाउमे व्यापार करल बटैले बटैं । शनिच्चरके रोज नेपाल दलित मुक्ति मोर्चाके पाँचौ राष्ट्रिय सम्मेलनमे सम्बोधन करटि उहाँ सहिदके सपनाके कुचिलके ओइनके नाउमे व्यापार करल आरोप लगैलैं ।
माओवादी केन्द्रके अध्यक्ष पुष्प कमल दाहाल ‘प्रचण्ड’ इंगित करटि सत्तामे पुगलपाछे सहिदके सपनाहे विस्राइल उहाँ बटैलैं । उहाँ कलैं, ‘प्रचण्ड, बाबुरामहे उहाँसम पुगैना महान सहिदहुकनके योगदान भारी रहल । मने, सत्तामे पुगलपाछे ओइनके अवस्थाबारे खबर नैलेहल उहाँ कलैं । ‘सत्ता बाहेर रलेसे सहिदके बाट करना मने, सत्तामे पुगलपाछे सहिदहे बिस्राजाइट, उहाँ कलैं, ‘नेपाल कम्युनिष्ट पार्टी सहिदके सपना पुरा करनाओर उन्मुख बा ।’
महासचिव चन्द सहिदके सपनाहे सकार करटि लैगिलेसे एकता हुइ सेक्ना बटैलैं । नेकपा माओवादी केन्द्रके अध्यक्ष पुष्प कमल दाहाल ‘प्रचण्ड’ कम्युनिष्ट पार्टी बीच एकता करना तयारी रहल बटाइल उहाँ माओेवादी केन्द्रसँग किल नैहोके समग्र कम्युनिष्ट पार्टी एक हुइना बटैलैं । अप्नेहुक्रे कुर्सीके लाग नैहोके जनताके लाग लरुइयनसँग एकता करना उहाँ दावी करलैं ।
ओस्टेक, नेता विप्लव जातीयबाद बिरुद्धमे नेपाल कम्युनिष्ट पार्टी डटके लग्ना बटैलैं । जातीय भेद्भाव करइया औरेक पस्ना लुटके खाइ खोजलहुकनके विरुद्ध लग्ना बटैलैं ।
नेपाल कम्युनिस्ट पार्टी निकट दलित मुक्ति मोर्चाके पाँचौँ राष्ट्रिय सम्मेलन धनगढीमे सुरु हुइल हो । २९ कात्तिकसम हुइना सम्मेलन उदटन आघे धनगढीमे प्रदर्शन समेत हुइल रहे । सम्मेलनमे देशके ७७ ठो जिल्ला तथा भारत प्रवाससे प्रतिनिधि, पर्यवेक्षक, स्वयंसेवक कैके साढे तीन सयजानेक सहभागिता रहल मोर्चा जनैले बा ।
सम्मेलनमे मुक्ति मोर्चाके आन्दोलनके समीक्षा, नयाँ विचार, रणनीति, कार्यदिशा, संगठनके नयाँ नाम ओ संरचना, नीति तथा कार्यक्रम लगायत विषयमे छलफल हुइ ।
