अगहन १ से सानेपामे अनसन बैठना डडेल्धुरा कांग्रेस सभापतिके चेतावनी

पहुरा समचारदाता
धनगढी, २७ कार्तिक । नेपाली कांग्रेस डडेल्धुराके सभापति कर्णबहादुर मल्ल केन्द्रीय निर्वाचन समितिके भूमिकाउप्पर प्रश्न उठैले बटै ।

उहाँ पार्टीके केन्दीय सभापति शेरबहादुर देउवाके निर्देशनमे समितिसे काम करटी रहल आरोप लगैलै । डडेल्धुरामे अपनेहुकनके बहिस्कारके बीच हुइल अधिवेशनहे समितिसे वैधता डेहे नइसेक्ना दावी करलै ।

‘हम्रे लिखित रुपमे सप्रमाण निर्वाचन समितिमे उजुरी डेहल हुई, का कटरा कारणसे डडेल्धुराके अधिवेशन वैध हुइल हो, समितिसे हम्रहिनहेफे जानकारी कराई परठ,’ जिल्ला सभापति मल्लसे शनिच्चर पार्टी कार्यालय सानेपामे पत्रकार सम्मेलन करटी कहलै, ‘केन्द्रीय सभापतिके निर्देशनमे समितिसे काम करटी रहल हो कि कना हम्रहिनहे लागल बा ।’

डडेल्धुरा जिल्ला कांग्रेस सभापति एवं प्रधानमन्त्री देउवाके गृहजिल्ला हो । डडेल्धुरामे वरिष्ठ नेता रामचन्द्र पौडेल पक्षके असहमतिके बीच हुइल वडा ओ पालिका अधिवेशनहे निर्वाचन समितिसे वैधता डेले बा ।

डडेल्धुरा जिल्ला सभापति मल्लसे अपनेहुकनके माग सुनुवाइ नइहुइल कहटी अगहन १ से पार्टी कार्यालय सानेपामे अनसन बैठना घोषणा करलै । ‘११ दिन हामी पार्टी कार्यालय डडेल्धुरामे अनसन बैठली, ओकरफे कौनो सुनुवाइ नइहुइल, उहाँ कहलै, आब हम्रे डडेल्धुरा जिल्लाके सक्कु वडाके क्रियाशील सदस्य सानेपामे अनसन बैठबी ।’

डडेल्धुरामे एकपक्षीय रुपमे अधिवेशन हुइल कहटी सभापति मल्ल पक्षसे फेरसे अधिवेशन हुई पर्ना माग करटी आइल बा । मने निर्वाचन समितिसे भर डडेल्धुरा जिल्लाके वडा ओ पालिका अधिवेशनहे वैधता डेटी महाधिवेशन कार्यतालिका सार्वजनिक करसेकल बा ।

समितिके पछिल्का संशोधित कार्यतालिकामे डडेल्धुरामे अगहन ३ गते प्रदेश सभा क्षेत्रीय अधिवेशन हुइना उल्लेख बा । वडा ओ पालिका अधिवेशन सम्पन्न हुइल ४६ जिल्लामे उहे मितिमे प्रदेश सभा क्षेत्रीय अधिवेशन हुइना निर्वाचन समितिसे जनैले बा ।

कांग्रेसके वडा अधिवेशन नइहुइल जिल्लामे शनिच्चरसे अधिवेशन प्रक्रिया शुरु हुइल बा । देशभरके १३ जिल्लामे कांग्रेसके वडा अधिवेशन हुइना बाँकी रहे । कांग्रेसके केन्द्रीय महाधिवेशन अगहन २४ से २६ सम काठमाडौंमे हुई ।