अपाङता प्रादेशिक नीति बनाई पर्नामे जोड
पहुरा समाचारदाता
धनगढी, २७ कार्तिक । अपाङता रहल व्यक्तिहुकनके हक अधिकार सुनिश्चत कैना अपाङता प्रादेशिक नीति निर्माणके लाग पहल कैनामे जोड डेह बा ।
राष्ट्रिय अपाङग महासंघ नेपाल सुदूरपश्चिम प्रदेश समितिके आयोजनामे शनिच्चरके रोज धनगढीमे हुइल ‘सुदूरपश्चिम प्रदेशमे बन्टी रहल अपाङता प्रादेशिक नीति निर्माणके सम्बन्धमे पत्रकारहुकनके सहगोगके लाग वकालत वार्ता’ कार्यक्रममे प्रदेश अध्यक्ष उपेन्द्र बहादुर खडायत प्रदेश सरकारसे अपाङता प्रादेशिक नीति निर्माणके ढिलाई करटी रहल ओरसे संचारमाध्यमसे पहल कैदेना आग्रह करल रहिट ।
‘प्रदेशमे ढेर नीति बनसेकल बा । प्रदेश सरकारसे ४२ नीति बनाई अपाङता रहल समुदायके लाग फे नीति बनैना कहल रहे,’ प्रदेश अध्यक्ष खडायत कहलै, अपाङता प्रादेशिक नीति नइबनल कारण अपाङता रहल व्यक्ति सेवा सुविधासे बन्चित हुई परल बा ।’ भौतिक पूर्वधार अपाङता मैत्री नइहुइल कारण सेवा लेना कर्रा हुइल । यातायातमे ५० प्रतिशत छुट, अलगे सितके व्यवस्था रहना कहल मने कार्यान्वयन नइहुइल प्रदेश अध्यक्ष बटैलै ।
महासंघके केन्द्रीय सदस्य रुपा राई अपाङगता रहल समुदायके लाग संविधानसे ढेर हकअधिकार सुनिश्चित करल मने कार्यान्वयन नइहुइल बटैली । कार्यक्रममे राष्ट्रिय अपाङग महासंघ नेपाल सुदूरपश्चिम प्रदेशके कार्यक्रम अधिकृत प्रिया खडका महासंघसे करटी आइल गतिविधिबारे जानकारी डेहल रहिट । महासंघसे नीति नियम संशोधन, निर्माण, कार्यान्वयनके लाग जनवकालत, नीति निमय निर्माणमे संघीय ओ प्रदेश सरकारहे प्राविधिक सहयोग, सहकार्य, नीति नियमके बारेमे सरोकारवालाहे अभिमुखीकरण, अपाङता रहल व्यक्तिके समग्र मानव अधिकारके मुल्याँकन तथा ओकर प्राप्तीके लाग जनवकालत करटी आइल बटैली ।
सुदूरपश्चिमके २०६८ के जनगणना अनुसार अछाममे ८६०२, बैतडीमे ७७८८, बझाङमे ४९७६,बाजुरामे ५८९५, डडेल्धुरामे ५१५०, डोटीमे ७३०२, कैलाली १५३७८, कञ्चनपुरमे ९०७२, दार्चुलामे ३६६९ जाने अपाङता रहल व्यक्ति रहल महासंघ जनैले बा । कार्यक्रम राष्ट्रिय अपाङग महासंघ नेपाल सुदूरपश्चिम प्रदेश अध्यक्ष उपेन्द्र खडायतके अध्यक्षतामे हुइल रहे । कार्यक्रममे नेपाल पत्रकार महासंघ कैलालीके अध्यक्ष हिमालय जोशी ओ कञ्चनपुर अध्यक्ष माधव धामी अपाङगता रहल व्यक्तिहुकनके हक अधिकारके लाग संचारकर्मी कबु पाछे नइपर्ना प्रतिवद्धता जनैले बटै । कार्यक्रमके संचालन महासंघके सचिव भगेन्द्र सिंह करले रहिट ।
