सुदूरपश्चिममे ठप २३ मे कोरोना संक्रमण
पहुरा समाचारदा
धनगढी, २९ कार्तिक । सुदूरपश्चिम प्रदेश पछिल्का २४ घण्टामे ठप २४ जनहनमे कोरोना संक्रमण पुष्टि हुइल बा ।
सामाजिक विकास मन्त्रालय स्वास्थ्य निर्देशनालयसे डेहल जानकारी अनुसार ९ सय ६८ जनहनके कोरोना परिक्षण करेबेर २३ जनहनमे संक्रमण पुष्टि हुइल हो । कलेसे पछिल्का २४ घण्टामे एक जाने कोरोना संक्रमितके ज्यान गैल बा ।
८ सय ७९ जानेक एन्टिजेन परिक्षण करेबेर ४ जनहनमे, ८९ जानेक आरटी पिसिआर जाँच करेबेर १९ जनहनमे कोरोना पोजेटिभ डेखल मन्त्रालय जनैले बा । कोरोना संक्रमणसे ज्यान गुमाइलमे कैलाली जिल्ला लम्की–चुहा नगरपालिका–५ के ७८ बरसके एक जाने पुरुषके कोभिडके कारण भेरी अस्पताल नेपालगंजमे उपचारके क्रममे ज्यान गैल मन्त्रालय जनैले बा ।
ओस्टेक पछिल्का २४ घण्टामे ६ जाने ठिक हुके घर लौटल बटै । हालसम सुदुरपश्चिम प्रदेशमे ६ सय ८ जानेक कोरोना संक्रमणसे ज्यान गैल जनागिल बा ।
ओस्टेक २४ घण्टामे देशभर ठप ४१६ जनहनमे कोरोना भाइरस संक्रमण पुष्टि हुइल बा । ७ हजार ५ सय ५४ जानेक पीसीआर परीक्षण करेबेर ३६७ जानेकमे ओ ४ हजार ४ सय ४८ जानेक एन्टिजेन परीक्षण करेबेर ४९ जाने करके ४१६ जनहनमे कोरोना भाइरसके संक्रमण डेखल स्वास्थ्य तथा जनसंख्या मन्त्रालय जनैले बा ।
ओस्टेक पछिल्का २४ घण्टामे कोरोना संक्रमणसे १ जनहनके मृत्यु हुइल बा । कलेसे २७० जाने ठिक हुइल बटै । सोम्मार ठपलसंगे नेपालमे कोरोना संक्रमितके कुल संख्या ९ लाख १२ हजार ४६९ पुगल बा । यी संगे नेपालमे मृत्यु हुइलके संख्या ११ हजार ४७८ पुगल बा कलेसे ७ लाख ९८ हजार ५४४ जाने संक्रमणमुक्त हुइल बटै ।
मन्त्रालयके अनुसार हाल देशभर सक्रिय संक्रमितके संख्या ७ हजार ३११ जाने रहल बटै । जौन मन्ये ६ हजार ७७९ जाने होम आइसोलेसनमे रहल बटै कलेसे ५३२ जाने संस्थागत आइसोलेसनमे रहल बटै । कोरोनाके बिरामीमन्से २२५ जाने आईसीयू ओ ६६ जाने भेन्टिलेटरमे उपचाररत बटै ।
ओस्टेक करके १० वर्ष टरेक १४ बालबालिकामे कोरोना संक्रमण पुष्टि हुइल बा कलेसे ११ से २० वर्ष उमेर समूहके २५ जाने कोरोना संक्रमित थपल बटै ।
