जन्मान्तरके लाग घुम्ती शिविर
पहुरा समाचारदाता
हसुलिया, २९ कार्तिक । कैलालीके कैलारी गाउँपालिकामे नम्मा अवधिके जन्मान्तरके लाग सेटेलाइट क्लिनिक घुम्ती शिविर सोम्मारसे सुरु हुइल बा ।
कैलारी गाउँपालिका स्वास्थ्य शाखाके आयोजनामे वडा नम्बर १ स्थित मनाउँ आधारभूत स्वास्थ्य केन्द्रसे घुम्ती शिविरके सुरुवात करल हो । उ ठाउँमे हुइल शिविरमे ३२ जाने महिला नम्मा अवधिके जन्मान्तरके लाग सेवा लेले बटै ।
पाँच वर्षसम जन्मान्तरके लाग ३१ जाने इम्प्लान्ट ओ १२ वर्षसम जन्मान्तरके लाग एक जाने आइयुसीडी सेवा लेहल स्वास्थ्य शाखा प्रमुख वीरेन्द्र सापकोटासे जानकारी डेलै । मंगरके बनकट्टा आधारभूत स्वास्थ्य केन्द्र ओ बुधके गदरिया स्वास्थ्य चौकीमे शिविर आयोजना हुइना जनाइल बा ।
शिविरमे गाउँपालिकाके लेखापाल दीपेन्द्र चौधरी, स्वास्थ्य शाखाके कर्मचारीके उपस्थिति रहल रहे । सिनीयर अनमी सृजना चौधरी ओ सिनीयर अनमी निरीक्षक बिन्द्रा आचार्य सेवाग्राही महिलाहे सेवा प्रदान करले रहिट ।
