वृहत डान्स प्रतियोगितामे सनम ओ न्यू भिजन पहिल
पहुरा समाचारदाता
भजनी, ०१ अगहन । कैलालीके भजनी नगरपालिका–२ मोहनपुर गाउँमे हुइल तीन दिने बृहत डान्स प्रतियोगितामे एकल ओर खैराके सनम चौधरी ओ सामूहिक ओर न्यू भिजन डान्स कला केन्द्र टीकापुर पहिल हुइल बटै ।
सोम्मार रात हुइल फाइनल प्रतियोगितामे विजेताके टुङगो लगाइल हो । मोहनपुर गाउँ समाजके आयोजनामे हुइल प्रतियोगितामे एकलओर लक्कडके हेमा कठरिया दुसरा ओ सोनाफाँटाके बासुदेव चौधरी टिसरा हुइलै ।
ओस्टेक करके, सामूहिकओर महादेवलीके डीबीएस डान्स ग्रुप दुसरा ओ लालबोझीके न्यू स्टार बाल क्लब टिसरा हुइल प्रतियोगिताके संयोजक गंगा चौधरी जानकारी डेलै । उहाँ कार्यक्रम भव्य ओ सभ्य रुपमे सम्पन्न हुइल बटैलै ।
प्रतियोगितामे एकल ओ सामूहिक नृत्यओर कैलालीके पूर्वी क्षेत्रके टमान गाउँके कलाकार ओ नृत्य केन्द्र, समूहसे भाग लेहल रहिट । तीनसम चलल उ साँस्कृतिक कार्यक्रम तथा डान्स प्रतियोगितामे चर्चित थारु गायिक अन्नु चौधरी, कलाकार आयशा चौधरी, सुनिता चौधरी (फकलपुरान बुदी), सत्यनारायण फेँटारा लगायतकासे अपन गला ओ कला प्रस्तुत करले रहिट ।
