घोडाघोडीमे चिरैँ फोटोग्राफी प्रतियोगिता हुइना

पहुरा समाचारदाता
सुख्खड, १ अगहन । कैलालीके घोडाघोडी नगरपालिकामे चिरैँ फोटोग्राफी प्रतियोगिताके आयोजना कैना हुइल बा ।

पालिकामे रहल बृहत् घोडाघोडी ताल तथा पर्यटन विकास बोर्डके आयोजनमे इहे अगहन १६ ओ १७ गते प्रतियोगिता आयोजना हुइना जनाइल बा ।

जैविक विविधता सँगे चिरैँनके महत्वपूर्ण बासस्थानके रूपमे रहल घोडाघोडी ताल क्षेत्रहे चिरैँ पर्यटनके रूपमे विकास कैना प्रतियोगिताके आयोजना करल बोर्डके उपाध्यक्ष दयाराम चौधरी बटैलै ।

चिरैँन सँगे इ क्षेत्रके थप प्रचार प्रसार ओ पर्यटन विकासके लाग देशभरसे फोटोग्राफरहे आमन्त्रित करजैना बा । उहाँ कहलै, “हाल सम इ क्षेत्रमे हुइ नैसेकल काम पहिलचो हम्रे करटी रहल बाटी । इहीसे घोडाघोडीके पर्यटन विकासमे बरवार मद्दत पुग्ना विश्वास फेन करले बाटी ।”