केदारनाथ मेला ओराइल
अछाम, २ अगहन । १० दिनसम देवताके धेवल आराधानासहित लागल केदारनाथ मेला बिफेक रोज ओराइल बा । मेलामे टमान श्रद्धालु भक्तजनके सहभागितामे नियमित पुजाआज हुइल रहे ।
अछामके कमलबजार नगरपालिका वडा नम्बर ७ जामागाउँमे लागल मेला बिफेक रोज केदार ओ छडाल देवता मन्दिरमे दूध ओ घ्यु खाइलसंगे ओराइल हो ।
हरेक वर्ष कात्तिक शुक्ल पञ्चमीसे कात्तिक शुक्ल चतुर्दशीसम धेवल ओ मेला लागठ । ९ दिनसम धेवल अर्थात् देवताके पूजा आराधाना ओ धामी खला नच्ठैं ।
विगतके वर्षमे कात्तिक शुक्ल त्रयोदशीके दिन भारी संख्यामे व्यक्तिके उपस्थिति सहित रात्रि मेला लग्लेसे फेन गैल २ वर्ष कोरोना भाइरस संक्रमणके कारण नित्य पूजा किल हुइल रहे । यी वर्ष फेन मेलामे रौनकता छाइल साविकके सेरा गाविसके पूर्व अध्यक्ष दीपक अधिकारी बटैलैं । केदारनाथके मन्दिरमे यी वर्ष ५७ किलोग्रामके घण्ट समेत चह्राइल बा । स्थानीय खतिवडा बन्धुहुक्रे करिब ८० हजारके लागतमे घण्ट खरिद कैके मन्दिरमे चह्राइल शंकर खतिवडा बटैलैं ।
१० दिनसम देवताके पूजा, खला नच्ना ओ रात्रि मेला तथा केदारनाथ मन्दिरमे दूध, घ्यू चह्रैना केदारनाथ मेलाके विशेषता हो । अछाम जिल्लाके भैसोले क्षेत्रके अन्तिम मेलाके रुपमे जामाके जात्राहे लेजाइठ । मेलाके अवसरमे डेउडा, न्याउले खेल खेल्जाइठ ।
मेलामे केदार, छडाल ओ बेताल कैके ३ देवताके धामीसे देवताके दैविक कला डेखैठैं । पहिलेसे डोटीके बडीकेदारसे अछामके सेरा जामागाउँमे बसोबास करुइयन मेला नानल मन्दिरके पुजारी खडकराज उपाध्याय बटैलैं ।
