टीकापुर नगरपालिका नगर साक्षर घोषणा

पहुरा समाचारदाता
टीकापुर, ५ अगहन । टीकापुर नगरपालिकाहे नगर साक्षर घोषणा करल बा । टीकापुर नगरपालिका शिक्षा युवा तथा खेलकुद शाखाके आयोजनामे सामाजिक विकास मन्त्री लालबहादुर खड्का शनिच्चरके रोज एक कार्यक्रममे टीकापुर नगरपालिकाहे नगर साक्षर घोषणा करल हुइट ।

टीकापुर नगरपालिकाके नगर प्रमुख तपेन्द्र रावलके अध्यक्षतामे हुइल कार्यक्रममे सामाजिक विकास मन्त्री लालबहादुर खड्का, प्रदेश सभासद उमादेवी वादी, टीकापुर नगरपालिकाके प्रमुख प्रशासकीय अधिकृत दमनसिंह चौधरी, लोकतान्त्रिक समाजवादी पार्र्टीके लक्ष्मणकिशोर चौधरी, प्राकृतिक स्रोत तथा व्यवस्थापन केन्द्रके डिन ओेमप्रकास सिंह, पत्रकार योगेश रावल, नगर शिक्षा समितिके सदस्य अर्जुन रावल लगायत मन्तव्य व्यक्त करले रहिट ।

टीकापुर नगरपालिका शिक्षा युवा तथा खेलकुद शाखा प्रमुख नरेश अवस्थी टीकापुर नगरपालिकाके सक्कु वडा साक्षर घोषणा कैना क्रममे विफेक ओ शुकके रोज टीकापुरमे वडा नम्बर १, २ ३, ४, ५, ६, ७, ८ ओ ९ हे साक्षर घोषणा करटी शनिच्चर नगर साक्षर घोषणा करल बटैलै ।

टीकापुर नगरपालिकाके साक्षरता दर ९८ प्रतिशत रहल जनाइल बा । सामाजिक विकास मन्त्री लालबहादुर खड्का टीकापुर नगरपालिकाके नगर प्रमुख तपेन्द्रबहादुर रावलहे प्रमाणपत्र प्रदान करके टीकापुर नगरपालिकाहे नगर साक्षर घोषणा करल रहे ।