डडेल्धुरासे महाधिवेशन प्रतिनिधिमे चुनाव लरटी सभापति देउवा
काठमाडौं, ६ अगहन । प्रधानमन्त्री तथा नेपाली काँग्रेसके सभापति शेरबहादुर देउवा महाधिवेशन प्रतिनिधिके लाग चुनाव लरना हुइल बटै ।
सभापति देउवा डडेल्धुरासे महाधिवेशन प्रतिनिधिमे चुनाव लरना हुइल हुइट । देउवा मन्जुरीनामे मार्फत उम्मेदवारी डेके महाधिवेशन प्रतिनिधिमे चुनाव लरना तयारी करल डडेल्धुराके जिल्ला सभापतिके उम्मेदवार भीमबहादुर साउद जानकारी डेलै ।
काँग्रेस विधानके धारा १५ के उपधारा १(ग) मे केन्द्रीय समितिके पदाधिकारी ओ सदस्यहुक्रे स्वतः एक अवधिके लाग महाधिवेशन प्रतिनिधि हुइना उल्लेख बा । साउदके अनुसार देउवाहे विगतमेफे डडेल्धुरासे महाधिवेशन प्रतिनिधिमे चुनाव लडाके नन्ना करटी आइल रहे ।
‘हमार सम्माननीय प्रधानमन्त्रीहे जिल्लासे महाधिवेशन प्रतिनिधि लडैबी । उहाँ स्वतः महाधिवेशन प्रतिनिधि हुइट । मने हमे्र प्रत्येक महाधिवेशनमे उहाँहे जिल्लासे पठैना करल रही । भाउजू (देउवा पत्नी आरजु राणा)हेफे डडेल्धुरासे लडैना हुइल बटी,‘उहाँ कहलै ।
ओस्टेक गोविन्द बोहोरा, नैनसिंह महर, रघुवीर भट्ट, जनक कलौनी लगायतके नेताहुक्रे अधिवेशनके तयारीमे जुटल साउदके कहाई बा । उहाँ कहलै, ‘डडेल्धुराके अधिवेशन उत्साहजनक रुपमे सम्पन्न हुइटी बा । डडेल्धुरा पुरे झिलिमिली हुइल बा । जिल्ला अधिवेशनके लाग मनै काल्हीसे आसेकल बटै । एक ठो ऐतिहासिक पर्वके रुपमे अधिवेशन सम्पन्न करटी बटी ।’
डडेल्धुरामे आज जिल्ला अधिवेशनफे हुइटी बा । साउदके अनुसार ११ बजे उम्मेदवारी दर्ता हुइना बा कलेसे एक बजेपाछे मतदान सुरु हुई । यहोर वर्तमान सभापति कर्णबहादुर मल्ल समूहसे भर जिल्लामे सक्कु तहके अधिवेशन बहिस्कार करले बा । मल्ल समूह अगहन एक गतेसे पार्टी केन्द्रीय कार्यालय सानेपामे रिले अनसनमे बा ।
