विद्यालयके सरसफाईमे क्रमिक सुधार
पहुरा समाचारदाता
धनगढी, ८ अगहन । कैलालीके धनगढी उपमहानगरपालिका ओ गोदावरी नगरपालिकामे रहल विद्यालयमे सरसफाईमे क्रमिक सुधार हुइटी रहल जनाइल बा । जीआइजेडके सहयोग तथा प्रयास नेपालके कार्यान्वयन सञ्चालित विद्यालय खानेपानी सरसफाई स्वच्छता प्रवद्र्धन कार्यक्रमसे स्कूलमे सचेतनाके कार्यक्रम कुछहदसम हुइलेसेफे सुधार हुइल जनाइल हो ।
विद्यालयमे खानेपानी तथा सरसफाइ स्वच्छतामे वृद्धि नन्ना उद्देश्यके साथ जीआइजेडके सहयोगमे धनगढी उपमहानगरपालिका ओ गोदावरी नगरपालिकाके १७ ठो विद्यालयमे कार्यक्रम सञ्चालन करल बा ।
कार्यक्रम लागूपाछे विद्यालयके सरसफाईके अवस्थामे ढेर हदसम परिवर्तन आइल विद्यालयमे खानेपानी तथा सरसफाइ स्वच्छता अनुगमन कार्यक्रमके संयोजक राम बानियाँ बटैलै । उहाँ दुनु नगरके कुछ विद्यालयमे कार्यक्रम करल विद्यालयमे सरसफाइ बढल बटैलै । मंगरके रोज धनगढीमे आयोजना करल सचेतना अभिवृद्धि सम्बन्धी कार्यक्रममे ओइने पछिल्का समय विद्यालयमे भौतिक पूर्वाधार तथा सरसफाईमे सुधार हुइटी रहल उहाँ बताइल हुइट ।
विद्यालयमे गठन करल विद्यालय स्तरीय वास समितिसे यकर लाग भूमिका निर्वाह करटी रहल कार्यक्रममे बटाइल बा ।
जिल्लास्थित शिक्षा विकास समन्वय कार्यालयके प्रमुख बैकुण्ठ सुवेदी साझेदार संस्थाहुकनके सहयोग ओ सक्रियतामे विद्यालयसे सरसफाइमे सुधार करटी बटैलै । उहाँ विद्यालयके छात्राहुक्रे अपन स्वास्थ्य विषयके शिक्षकसंग निर्धक्कसंग सेनिटरी प्याड मग्ना ओ प्रयोगपाछे व्यवस्थित तरिकासे ‘डिस्पोज’ कैना कार्य करटी रहलफे बटैलै ।
‘अब्बे कुछ मजा प्रयास हुइटी रहल बा,’ उहाँ कहलै । ‘मने, एक जे काम करके तीन तारा प्राप्त नइहुई । विद्यालयहुक्रेफे अपन भिजन बनाके स्थानीय सरकार समक्ष धारे परठ ।’
मने, कतिपय विद्यालयमे सरसफाइ स्वच्छता सम्बन्धी समिति हुइलेसेफे सरसफाइ भर नइकैना करल बटाइल बा । गोदावरी नगरपालिकाके वडा नम्बर ११ ओ १२ के विकट क्षेत्रके विद्यालयमे सरसफाइ कैना समस्या रहल जनाइल बा । उ क्षेत्रमे पानीके अभाव रहल कारण कुछ चुनौती रहल गोदावरी नगरपालिका शिक्षा शाखाके विष्णु अवस्थी बटैलै । उहाँ कहलै–‘कुछ हद्सम परिवर्तन आइल बा । मने, जटरा हुई पर्ना रहे ओटरा हुइल नइहो ।’
कार्यक्रम लागू हुइलपाछे छात्राहुक्रे निर्धक्कसंग सेनिटरी प्याड मग्ना कार्यमे भर बढोत्तरी हुइल अवस्थी बटैलै । ‘महिनावारी हुइल बेला छात्राहुक्रे अपन स्वास्थ्य शिक्षकसंग निर्धक्क रुपमे सेनेटरी प्याड मग्ठै, उहाँ कहलै ।
धनगढी उपमहानगरपालिकाके शिक्षा शाखाके अकबर चन्द कोभिडके महामारी सुरु हुइलपाछे विद्यालयमे सरसफाइ बढल बटैलै । ‘ढेर जैसिन विद्यालयमे हात धुइना व्यवस्थासहित सरसफाइ बढल बा’, उहाँ कहलै ।
प्रयास नेपालके अध्यक्ष लोकराज जोशीके अध्यक्षतामे कार्यक्रम हुइल रहे । खानेपानी तथा सरसफाइ स्वच्छता कायमके लाग विद्यालयहुक्रे अपने करल कामके आधारमे तारा पैना करल जोशी बटैलै । उहाँ १० ठो सूचकमे तारा डेना कार्य हुइटी रहल उल्लेख करटी सबसे मजा हुइलेसे मजा हुइलसे तीन तारा प्राप्त कैना करल उल्लेख करलै ।
कार्यक्रममे कैलालीके पत्रकार महासंघके अध्यक्ष हिमालय जोशी संघसंस्थाहुक्रे विद्यालयमे जनचेतनाके कार्यक्रमहे मुख्य प्राथमिकता डेहे पर्ना बटैलै । ‘सामुदायिक विद्यालयमे भौतिक संरचना बटै, उहाँ कहलै । ‘मने, सहि रुपमे प्रयोग नइकरेबेर समस्या हुइना करल बा । यहोर ध्यान डेना आवश्यक बा ।’ उहाँ संघसंस्थाहुकनके मजा काममे पत्रकारहुकनके समर्थन रहल जोड डेलै । जीआइजेडके सहयोग ओ प्रयास नेपालके व्यवस्थापनमे कार्यक्रम हुइल रहे ।
