हिंसामुक्त गाउँपालिका घोषणाके लाग नीति तथा कार्यक्रम लन्ले बाटी: अध्यक्ष चौधरी
पहुरा समाचारदाता
हसुलिया, ९ अगहन । कैलारी गाउँपालिकाके अध्यक्ष लाजुराम चौधरी महिला हिंसा न्यूनीकरण कैना ओ गाउँपालिकाहे नै हिंसामुक्त गाउँपालिका घोषणाके लाग नीति बजेट ओ कार्यक्रम लानल बटैले बाटै ।
‘घरसे शुरु करी, महिला हिंसा अन्त्य करी’ कना मूल नारा सहित लैङ्गिक हिंसा विरुद्धके १६ दिने अभियानहे सम्बोधन कैटी अध्यक्ष चौधरी गाउँपालिकाहे हिंसामुक्त घोषणाके लाग नीति बजेट ओ कार्यक्रम लानल बटैलै ।
‘महिला हिंसामुक्त गाउँपालिकाके लाग हम्रे नीति बजेट ओ कार्यक्रम लन्ले बाटी’, अध्यक्ष चौधरी कहलै–‘उक्त नीति बजेट ओ कार्यक्रमहे हम्रे तदारुकताके साथ कार्यान्वयन कैटी हाली हिंसामुक्त गाउँपालिका घोषणा कैबी ।’
कार्यक्रमके बर्का पहुना समेत रहल अध्यक्ष चौधरी कानुनमे टमान मेरिक व्यवस्था रलेसे फेन हिंसा हुइना दरमे कमी नैआइल बटैलै । विपतके समयमे होए अथवा सामान्य अवस्थामे महिला नै लैङ्गिक रुपमे अति नै पीडा भोगे पर्ना अवस्था रहल उहाँ बटैलै ।
कार्यक्रममे गाउँपालिका उपाध्यक्ष लक्ष्मी सत्गौंवा महिलाहुक्रे सशक्तिकरणसे किल हिंसा न्युनीकरण नैहुइना बटैटी उहाँ महिलाहे सामाजिक ओ आर्थिक सशक्तिकरण संगे निर्णायक ओ नेतृत्वदायी भुमिकासम पुगाइ पर्ना बटैली ।
कार्यक्रमे समीक्षा महिला विकास बहुउद्देश्यीय सहकारी संस्थाके अध्यक्ष उर्मिला चौधरी, ओरेक नेपालके विष्णु रेग्मी फेन मन्तव्य राखल रहिट ।
नोभेम्बर २५ से सञ्चालन हुइल अभियान अगामी १० डिसेम्बरसम कैलारी गाउँपालिका अन्र्तगत टमान कार्यक्रम कैके मनाजैना महिला तथा बालबालिका शाखा प्रमुख बाल कुमारी जानकारी डेली ।
अभियान अन्र्तगत पारिवारिक संवाद कार्यक्रम, महिला पुरुष समविकास तालिम, सासू बुहारी अन्तरक्रिया कार्यक्रम, बालविवाह न्युनीकरण ओ लागुऔषध दुव्र्यसन न्युनीकरण सम्बन्धी अन्तरक्रिया कार्यक्रम, मावि स्तरीय वक्तृत्वकला प्रतियोगिता कैना प्रमुख चौधरी बटैली ।
कैलारी गाउपालिका महिला तथा बालबालिका शाखाके आयोजनामे हुइल अभियानहे सफल पारक लाग नेपाल रेडक्रस सोसाईटी एमरेड परियोजना, मर्सिकोर, ओरेक नेपाल, सामाजिक सेवा अध्ययन केन्द्र, समीक्षा महिला बहुउद्देश्यी सहकारी संस्था, पारदर्शी, चेतनशिल महिला विकास बहुउद्देश्यीय सहकारी संस्था, कालिका कृषि सहकारी संस्था, दलित महिला अधिकार मञ्च लगायत संघ संस्थाके सहकार्य रहल बा ।
गाउँपालिका उपाध्यक्ष लक्ष्मी सत्गौंवाके अध्यक्षतामे हुइल कार्यक्रमका बर्का पहुना गाउँपालिका अध्यक्ष लाजुराम चौधरी रहल रहिट । अभियानबारे महिला तथा बालबालिका शाखा प्रमुख बालकुमारी चौधरी जानकारी कराइ रही कलेसे कार्यक्रमके सञ्चालन सामाजिक विकास अधिकृत यगम कलेल करल रहिट ।
कैलालीके घोडीघोडामे १६ दिवसिय अभियान
कैलालीके घोडाघोडी नगरपालिकामे ‘घरसे शुरुवाट करी, महिला विरुद्धके हिंसा अन्त्य करी’ कना नाराके साथ ३० औं अन्तर्राष्ट्रिय १६ दिने महिला हिंसा विरुद्ध अभियान मनाइल बा ।
घोडाघोडी नगरपालिकाके उप प्रमुख प्रेमकुमारी थापाके वडका पहुना तथा इलाका प्रहरी कार्यालय सुखडके प्रमुख सागर बोहराके विशिष्ट पहुनामे हुइल कार्यक्रममे घोडाघोडी नगरपालिकाके रोजगार संयोजक रोहित जोशी, अस्थायी प्रहरी पोष्ट हरिनगरके धन बहादुर कार्की, बालकल्याण संघ टिकापुरके सामाजिक परिचालक सोनु राम चौधरी, वडा सदस्य चन्द्र चौधरीलगायत महिला हिंसा न्यूनिकरणमे जोड डेहल रहिट ।
घोडाघोडी नगरपालिका–१२ के अध्यक्ष पर्नाकुमार चौधरीके अध्यक्षतामे हुइल कार्यक्रमके संचालन सचिव धनीराम चौधरी ओ स्वागत वडा सदस्य ओमकला परियार करले रहिट ।
