काँग्रेस कैलालीके अधिवेशन स्थागित
पहुरा समाचारदाता
धनगढी, ११ अगहन । नेपाली काँग्रेस कैलालीके जिल्ला अधिवेशन अतिआवश्यक कार्यके आन्तरिक तयारी करे नइसेकल कारण दुसर सूचना प्रकाशित नइहुइटसमके लाग स्थागित हुइल बा ।
शुकके रोज धनगढीमे आयोजित पत्रकार सम्मेलनमे जिल्ला सभापति नर नारायण शाह शुकके रोज नेपाली काँग्रेस जिल्ला कार्य सम्पादन समितिके बैठकसे पार्टीके सुदूरपश्चिम प्रदेश अधिवेशन कैलालीमे करे पर्ना ओरसे ओकर तयारीके लागफे जिल्ला अधिवेशन स्थागित करल बटैलै । यिहे १६ ओ १७ गतेसे आयोजना करे पर्ना हुइल कारणसे आयोजक जिल्लाके हैसियतसे प्रदेश अधिवेशनके तयारीके लाग प्राप्त समयवाधि प्रयाप्त नइहुइल ओ जिल्ला अधिवेशनके व्यवस्थापनके लाग आवश्यक प्राविधिक एवं व्यवस्थापित कार्यके तयारीके निर्धारित तालिकासे पाछे सारल सभापति शाह बटैलै ।
‘अधिवेशनमे २५ सयके संख्यामा प्रतिनिधि अइलेसे उहाँहुकनके उपस्थितमे निर्वाचन प्रक्रिया आघे बह्राईबेर झण्डै ५÷७ दिन लागी, उहाँ कहलै, ‘यदि मतगणना हुइल ओ पहिलो चरणमे निर्णय नइहुइल कलेसे दुसरा चरणमेफे जैना बाट हुई । दुसरा चरणमे गैलेसे झन ढेर समय लागी ।’
संचारकर्मीन राखल जिज्ञाशामे उहाँ क्षेत्र नम्बर ४ के विवादके कारण भर अधिवेशन नइसारल स्पष्ट परलै । ‘क्षेत्र नम्बर ४ के अधिवशेन सम्पन्न हुसेकल बा,’ उहाँ कहलै, ‘निर्वाचन अधिकृतसे प्रतिवेदन अइना बाँकी बा उहीहे ढिलाइ कहे नइमिली ।’
नेपाली काँग्रेसके १४औं महाधिवेशन अन्र्तगत कैलाली जिल्लाके अधिवेशन यिहे अगहन १० गतेसे सुरु हुके अगहन ११ गतेसे मतदान प्रक्रिय तय हुइल रहे ।
हिमबहादुर रावलसे प्रदेश सभापतिमे उम्मेदवारी घोषण
नेपाली काँग्रेसके १४औं महाधिवेशन अन्र्तगत यिहे १६ ओ १७ गतेसे धनगढीमे हुइना प्रदेश अधिवेशनके प्रदेश सभापतिमे हिमबहादुर रावल उम्मेदवारी घोषणा करले बटै ।
शुकके रोज धनगढीमे पत्रकार सम्मेलनके आयोजना करके रावलसे औपाचरिक रुपमे प्रदेश सभापति पदके लाग उम्मेदवारी घोषणा करल हुइट । स्थानीय, प्रदेश ओ संघीय चुनावमे नेपाली काँग्रेसके एकलौटी जित सुनिश्चित करेक लाग अपन उम्मेदवारी रहल उहाँ जनैलै । रावल भर्खर हुइल क्षेत्रीय अधिवेशनसे कैलाली क्षेत्र–२ से महाधिवेशन प्रतिनिधि सदस्यमे विजयी हुइल बटै ।
सुदूरपश्चिम प्रदेशके बझाङ बाहेक सक्कु जिल्लामे घुमके सुझाव सल्लाह संकलन करटी रहल ओरसे नेपाली काँग्रेसके सभापति शेरबहादुर देउवाके सपोट हुइलेसे जिट सुनिश्चित हुइना उहाँ दाबी करलै । कार्यक्रममे नेपाली काँग्रेस केन्द्रीय मोहनसिंह राठौर लगायत नेताहुकनके उपस्थिति रहल रहे ।
