किसानके १ वर्षके नाफाँ १६ करोड बराबर
पहुरा समाचारदाता
लम्की, ११ अगहन । लम्कीचुहा नगरपालिका वडा १, लम्कीस्थित किसान बहुउदेश्यीय सहकारी संस्था एक वर्षके अवधिमे १६ करोड बराबर नाफा कमैले बा । आर्थिक वर्ष २०७७/०७८ मे संस्था खुदनाफाँ १५ करोड ९८ लाख ५५ हजार ९४ रुपैयाँ आम्दानी करना सफल हुइल सहकारी संस्थाके महाप्रबन्धक डम्बरबहादुर शाह बटैलैं ।
शुकके रोज सहकारी संस्थाके २७ औं वार्षिक साधारण सभामे महाप्रबन्धक शाह १८ करोड ९० लाख १७ हजार ६ सय शेयर पुँजी रहल जानकारी करैलैं । ५ सय करोड बराबरके कारोबार हुइल ओ संस्था सञ्चालनके लाग टमान १९ ठो नीति बनाके लागु करल उहाँ बटैलैं ।
संस्था हाल सुदूरपश्चिम प्रदेशके ६ जिल्लामे अपन शाखा बिस्तार करल ओ लुम्बिनी तथा कर्णाली प्रदेशमे समेत शाखा बिस्तारके क्रममे रहल संस्थाके सञ्चालक समिति अध्यक्ष सुरेन्द्रकुमार शाह बटैलैं । उहाँ सुदूरपश्चिमके अन्य तीन जिल्लामे यिहे वर्षभित्तर शाखा विस्तार करना बटैलैं । संस्था हाल २७ ठो शाखा ओ सेवा केन्द्रसे सेवाप्रबाह करटि बा कलेसे करिब २ सय ८० जाने ढेर कर्मचारी कार्यरत रहल अध्यक्ष शाह बटैलैं ।
संस्था बचत तथा ऋणके किल कारोबार नैकैके कृषि तथा आयआर्जनमे समेत किसानसंग काम करटि आइल संस्थाके कोषाध्यक्ष मायाराम धमाला बटैलैं । सहकारी नाफाँ किल नैहेरके सामाजिक उत्तरदायित्वके क्षेत्रमे कोरोनाकालमे समेत शेयर सदस्यहुकनहे बिना ब्याजसहितके ऋण सहुलियत, कोरोना संक्रमितहे उपचार खर्चमे सहयोग समेत करल बटैलैं ।
संस्थाके सल्लाहकार प्रमुख उदय खनाल सहकारीसे सहुलियत कर्जा, महिलाहे वित्तीय साक्षरताके साथे आर्थिक तथा सामाजिक रुपमे सशक्तीकरण करना महत्वपूर्ण भूमिका खेलल बटैलैं ।
संस्थाके लेखा संयोजक नृप कुंवँरसहकारी संस्थाके पुँजीगत सम्पतिमे ध्यान डेके टमान ठाउँमे अपन भवन निर्माणके लाग समेत लागे परना बटैलैं । किसानहुकनहे सहुलियत सरल कर्जा ओ विउविजनके साथे बिमा सम्बन्धी समेत सहयोग करेपरनामे उहाँक जोर रहे । किसानके उत्पादित बस्तुके बजारीकरण ओ व्यवस्थापनके लाग सितगृह भण्डारण सञ्चालनमे नन्ना समेत उहाँक सुझाव रहे ।
कार्यक्रममे राष्ट्रिय सहकारी बैंकके सञ्चालक सदस्य शिवा थापा किसान सहकारीसे करटिरहल कार्यके प्रसंशा करटि अभिन अपन राष्ट्रिय सहकारी बैंकसे करे सेक्ना सहयोग करना प्रतिबद्धता जनैलैं ।
लम्कीचुहा नरपालिकाके निमित्त प्रमुख प्रशासकीय अधिकृत बिक्रम चौधरी किसान सहकारी कृषि ओ किसानके आर्थिकस्तर उप्पर उठाइक लाग करटिरहल प्रयासके प्रशंसा करटि यी कार्यमे नगरपालिकाके एकडम साथ ओ सहयोग रहना बटैलैं । उहाँ सहकारी ओ नगरपालिकाके संग सहकार्यमे हाल किसानहे कृषिकार्यमे आकर्षित करेक लाग सहुलियत कृषि कर्जामे ब्याज अनुदान, निःशुल्क माटि परिक्षण, मलखाद बिक्रीवितरण, किसानस्मार्ट ओ कोल्डस्टोर सञ्चालनके लाग आवश्यक प्राविधिक सहयोग, आखी उपचार केन्द्र सञ्चालन ओ एमबिबिएस छात्रबृति कार्यक्रम समेत नाने लागल बटैलैं ।
संस्थाके उपाध्यक्ष टिकेन्द्र थापा सहकारी अपन शेयर सदस्यहे सहजकर्जा ओ आयआर्जनके साथे स्वरोजगार कार्यक्रमहे प्राथमिकतामे ढरके काम करटिरहल बटैलैं । संस्थाके सचिव लोकराज तिमिल्सैना सहकारी नाफाँ ओ नोक्सानमे किल केन्द्रित नैहोके बिपन्न, आर्थिक अवस्था कमजोर रहल, गरिब ओ बेरोजगारके सारथी बनल बटैलैं ।
‘मै कुछ करम मने मोर ठन पैसा नैहो, लगानी र्नैहो’ कना जोश ओ जाँगर रहल युवा तथा महिलाके लाग किसान एकडम सहयोग करना तत्पर रहल बटैलैं ।
कार्यक्रममे किसान सहकारीके महिला समूहमे आबद्ध धनगढीके मीनादेवी पनेरु संस्थासे शेयर सदस्यहे डेटिरहल सेवा मजा रलेसे फेन व्याजदर ओ सहुलियत कर्जाके लाग सोचे परना बटैलि ।
