विद्यालयमे भवन अभाव होके पठनपाठनमे समस्या
कञ्चनपुर, १२ अगहन । कञ्चनपुरके कृष्णपुर नगरपालिका–१ भेटघाटफाँटामे रहेको वैजनाथ आधारभूत विद्यालयमे भवन अभाव होके साकिर कोठामे दुईठो कक्षा सञ्चालन करे पर्ना बाध्यता रहल बा । विद्यालयमे रहल भवनमे पाँच कोठा किल रहल बावै । एकठोमे कार्यालय कक्ष, औरेमे बालविकासके दुई कक्षा ओ बाँकी रहल तीन कोठामे पाँच कक्षासमके विद्यार्थीहे राखके पठनपाठनके कार्य हुइटी आइल बा ।
अक्के कोठामे एक कक्षाके विद्यार्थीहे उत्तरओर घुमाके ओ औरे कक्षाके विद्यार्थीहे दक्षिण ओर घुमाके पहै्रना करल बा । अक्के कक्षामे दुई÷दुई ठो कक्षा सञ्चालन हुइना हुइल ओरसे दुई शिक्षक अक्केसाथ पह्राइबर विद्यार्थीहे पह्राइल चीज नै बुझजैना हुइल ओरसे ढिउर समस्या हुइना करल बा । “दुई शिक्षक अक्केसाथ पह्राइबर विद्यार्थीहे बुझ्न ढिउर गाह्रो हुइल बा”, विद्यालयके प्रधानाध्यापक कृष्णा चन्द कहलै, “भवन अभाव होके अक्के कोठामे दुई कक्षा सञ्चालन कैना बाध्य रहल बाटी ।”
हिउँदके बेला घाम लागेबर एक कक्षाहे कोठामे ओ औरेहे चौरमे राखके पठनपाठन कैटी अइलेसे फेन कुहिरा लागल, पानी परल बेला दुई कक्षाहे अक्के राखके पह्राइ पर्ना अवस्था रहल उहाँ बटैलै । विद्यालयमे रहल दुई भवनमध्ये एक भवन सरकारीके ओरसे निर्माण करल हो । जेम्ने बालविकासका कक्षा ओ औरेमे कार्यालय सञ्चालन हुइटी आइल बा । औरे भवन दातृ निकायसे बनाडेहल हो । दातृ निकायसे बनाइल भवनमे रहल तीन कोठामे कक्षा १ से ५ समके बालबालिकाहे राखके पठनपाठन हुइटी आइल बा ।
कक्षाकोठामे विद्यार्थीहे बैठक लाग पर्याप्त बेञ्च ओ डेस्कके व्यवस्थासमेत रहल नैहो । भवनके व्यवस्था करक लाग नगरपालिकाके शिक्षा शाखामे घरी घरी पत्राचार कैलेसे फेन अश्वासनबाहेक भवन निर्माण हुइ नैसेकल विद्यालयके प्रअ चन्दके कहाइ रहल बा । विद्यालयके कार्यालय कक्षमे समेत दराजलगायत आवश्यक शैक्षिक सामग्रीकोसमेत अभाव रहल बा ।
विद्यालयमे सुकुम्बासी, दलित, जनजाति ओ भूमिहीन परिवारके बालिबालिका पठनपाठन कैटी आइल बाटै । विद्यालयमे १५० बालबालिका पह्रटी आइल बाटै । विद्यालयमे शिक्षक दरबन्दी समेत अभाव रहल बा । तीन जाने शिक्षिका राहत कोटामे ओ एक जाने शिक्षक निजी स्रोतमे कार्यरत रहल बाटै । निजी स्रोतमे कार्यरत शिक्षकके तलब व्यहोर्नसमेत विद्यालयहे धौधौ रहल बा ।
