उपमहानगरपालिका दिगो विकास लक्ष्यहे टेक्के कार्यदिशा बनैटी

पहुरा समाचारदाता
धनगढी, १३ अगहन । धनगढी उपमहानगरपालिकासे दिगो विकास १६ ठो लक्ष्यहे टेक्के अइना कार्यदिशा बनैटी रहल बा ।

जिआइजेड (सुशासन परियोजना)के सहयोगमे दिगो विकास लक्ष्य स्थानीयकरणहे थप प्रभावकारिताके साथ कार्यान्वयनमे लैजैना अइना मार्गचित्र निर्धारण करे लागल नगरप्रमुख नृपबहादुर वड बटैलै । दिगो विकास लक्ष्यके स्थानीय सम्बन्धमे पहिल कार्यशालासे गठिट कार्यदलसे तयार करल आवश्यक विश्लेषणात्मक प्रस्ताव (पहिल मस्यौदा) यथार्थपरल रहल नइरहल लेखाजोखा करके परिमार्जनके लाग अँँटवारके रोज धनगढीमे कार्यशाला सुझाव संकलन करल रहे ।

नगरप्रमुख वड सुदूरपश्चिमके ८८ ठो पालिकाके अगुवाई धनगढी उपमहानगरपालिकासे करटी रहल बटैलै । उहाँ कहलै, ‘हम्रे करल हरेक विषय ७७ पालिका अनुशरण करटी करठै । कोभिडके बेला निकारल अपिल ७७ पालिका कपी करलै, हम्रे करे खोजल चिजहे उ पालिकाफे अपनेहुकनहे समन्वय करठै । अग्रजके भूमिका निर्वाह करटी कुछ नयाँ देहे खोजले बटी ।’ अभिनसम राजनीतिक बाट ढेर करल, आब नागरिक उत्थान कैना ओर लग्ना जरुरी रहल उहाँ बटैलै । ‘यहाँके यूवा विदेश पलायन हुइटी रहल बटै । कैसिक रोके सेक्जाई, ‘उहाँ कहलै, ‘सामान्य घर, सामान्य बस्तीहे आघे बढाइक लाग व्यापाक छलफल हुइना जरुरी रहल बा ।’

उहाँ कहलै, ‘धनगढी उपमहानगरपालिका उत्पादनशिलता ओ अनुसन्धानके क्षेत्र लागल बा । ओकर साढे चार हजार मनै तालिमके लाग फाराम भरगिल बा । गरिबी हटाइक लाग प्राविधिक उद्यम क्षेत्रमे लैजैना जरुरी बा ।’

धनगढी उपमहानगरपालिका अपनेहे तालिम केन्द्र संचालन करटी तीन महिने तालिम, पाँच महिना तालिम डेहे लागल बटैटी प्रत्येक व्यक्तिहे प्राविधिक क्षेत्रमे जोरना उहाँ बटैलै ।

राष्ट्रिय योजना आयोगहे प्रदेश स्तरीय रिसर्च सेन्टर खोल्ना आग्रह करलै । तालिमहे तालिमके रुपमे केल लेहल मने सिखल चिज व्यवहारमे नइउटारल कारण तालिमके स्वरुप परिवर्तन कैना जरुरी रहल नगर प्रमुख वड बटैलै ।

राष्ट्रिय योजना आयोगके सदस्य मोहनदेव विष्ट जिआइजेडके सहयोगमे मस्यौदा तयार परटी रहल योजना आयोगमे समावेश कैना प्रतिवद्धता जनैलै । ‘हम्रे पञ्च वर्षिय योजना बनाइटी,’ उहाँ कहलै ‘धनगढी उपमहानगरपालिका यहाँके वास्तविक धराताल टेक्के यहाँके वास्तविक अवस्था भौगोलिक अवस्था, आर्थिक अवस्था, मानवीय सुचांकके अवस्था केलाके मस्यौदा तयार करटा उ हमार लाग मार्ग दर्शक बनी ।’ कृषिहे अभिन खासे प्रथामिकता नइदेहल कारण अभिन पाँच सय वरस विकासके हिसावसे पाछे परल उहाँ बटैलै ।

कार्यक्रममे जिआइजेड (सुशासन परियोजना)के प्रमुख मानफ्रेड पप्पी, नगर उपप्रमुख सुशीला मिश्र भट्ट, अर्थविद् नास्ट कलेजके प्राध्यापक शिवहरि मुडभरी मन्तव्य व्यक्त करले रहिट । उद्घाटन कार्यक्रमके संचालन डिल्लीराज ओझा करले रहिट । कार्यक्रममे अरुण रेग्मी सहजीकरण करले रहिट । कार्यदलसे तयार करल आवश्यक विश्लेषणात्मक प्रस्ताव पहिल मस्यौदा पंकजा जोशी, दिजराज भट्ट, डिल्लीराज ओझा, लेखनाथ ओझा, नारायण प्रसाद शर्मा प्रस्तुत करल रहिट ।