ट्रकके ठक्करसे एकके मृत्यु
पहुरा समाचारदााता
धनगढी,१३ अगहन । कैलालीके गोदावरी नगरपालिका–८ स्याउलेमे ट्रकके ठक्करसे एक युवकके मृत्यु हुइल बा ।
सोम्मार सकारे भैरहवासे अत्तरिया अइटी रहल ना ६ ख ५३६६ नम्बरके मालवाहक ट्रक पैदल यात्रु गोदावरी नगरपालिका–८ के १९ वर्षीय नरेश देउवाहे ठक्कर डेहल रहे । ट्रकके ठक्करसे देउवाके घटनास्थलमे मृत्यु हुइल रहे ।
ओहकान मृत्यु पाछे आफन्तहुक्रे पूर्वपश्चिम राजमार्ग अवरुद्ध करल रहिट । स्थानीय सडकमे टायर बारके राजमार्गमे अवरोध करल रहिट । मृतकके आफन्त ट्रक चालकहे कारबाही ओ क्षतिपूर्तिके माग कैटी राजमार्ग अवरुद्ध करल रहिट ।
ट्रक चालक कपिलवस्तु ९ भर्तापुरके २५ वर्षीय सैलेश नेपालीहे ट्रकसहित इलाका प्रहरी कार्यालय मालाखेती नियन्त्रणमे लेहल बा ।
शनिच्चरके रोज कैलालीके घोडाघोडी नगरपालिका ५ डोकेबजारमे ट्रकके ठक्करसे मोटरसाइकल चालक बसन्तराज शर्माके मृत्यु हुइलपाछे पूर्वपश्चिम राजमार्ग अवरुद्ध करल रहे ।
पश्चिमसे पुरुबओर जैटी रहल सु.प.प्र.०१ ००८ प ५४७५ नम्बरके मोटरसाइकले विपरीत दिशासे अइटी रहल लु १ ख ४६६६ नम्बरके ट्रक ठक्कर डेहल रहे ।
