कैलालीके सुन्दरपुरमे चौथा लवाङ्गी सांस्कृतिक कार्यक्रम हुइना
पहुरा समाचारदाता
धनगढी, १३ अगहन । कैलालीके गौरीगंगा नगरपालिका–१०, सुन्दरपुरमे चौथा लवाङ्गी सांस्कृतिक कार्यक्रम २०७८ हुइना हुइल बा ।
‘भाषा, कला संस्कृति हमार पहिचान, थारु वैदिक गुरुवा प्रशिक्षण केन्द्र संगे थारु संग्राहलय बनैना हमार अभियान’ कना मूल नारा सहित इहे अगहन १६ ओ १७ गते कार्यक्रम हुइना हुइल हो ।
लवाङ्गी सांस्कृतिक कार्यक्रमके उद्घाटन सुदूरपश्चिम प्रदेशके भौतिक पूर्वाधार विकास मन्त्री दिर्घ सोडारीसे हुइना आयोजक जनैले बा ।
कार्यक्रमके पहुनामे थारु कल्याणकारी सभाके केन्द्रीय सदस्य राम चरण चौधरी, वडा नम्बर १० के वडा अध्यक्ष पदम बहादुर ऐर लगायत रहना जनाइल बा । साथे कार्यक्रममे कलाकारहुक्रनके फेन वेजोड प्रस्तुती रहना जनाइल बा ।
कलाकारमे थारु लोक गायक मनिराम चौधरी, मोडल महिमा कुश्मी, सुनिता चौधरी, बीर चौधरी, घोडाघोडी नाट्य समूहके नाच, फुल कुमारी, गायक राजु चौधरी, गायिका संगीता चौधरीके बेजोड प्रस्तुती रहना मिडिया संयोजक दिनेश दहित जनैले बाटै ।
ओस्टके आदर्श महतो डान्स ग्रुप, आइसा चौधरी, गायक खुशी रत्गैया, अञ्जन चौधरी, तुफान चौधरीके फेन वेजोड प्रस्तुती रहना मिडिया संयोजक दहित जानकारी डेलै । कार्यक्रमके उद्घोषक सुनिता चौधरी (फकलपुरान बुडी) रहल बाटी ।
थारु गुरुवा बदैवा समाज सेवा समिति कैलालीके आयोजनामे हुइना कायक्रमहे टमान संघसंस्था सहकार्य करले बाटै । कार्यक्रमहे सहयोग करुइया संघ सस्थामे गौरीगंगा नगरपालिका १० नम्बर वडा कार्यालय, किसान बहुउद्देश्यीय सहकारी संस्था लम्की, निराजन फेन्सी स्टोर रहल बा ।
मिडिया पार्टनरमे पहुरा मिडिया प्रालि धनगढी, रेडियो मनको मझेरी एफएम, कैलारी अनलाइन, रेडियो सुनौलो एफएम रहल बा ।
