ओली दोसर चो एमाले अध्यक्षमे विजयी
काठमाडौं, १४ अगहन । एमालेके १० औं महाधिवेशनसे दोसर कार्यकालके लाग अध्यक्षमे केपी शर्मा ओली निर्वाचित हुइल बटैं । सर्वसम्मत हुइना ओलीके आंकाक्षामे भीम रावल चुनौती खडा करलपाछे उहाँ महाधिवेशनमे मंगरके रोज हुइल मतदानसे बहुमतसे विजयी हुइल हुँयट् ।
उहाँ अभिनसम १८३७ मत नन्ले बटैं । रावल २२३ मत पैले बटैं । स्रोतके अनुसार गणना करल मतके रुजु हुइटिरहल ओरसे प्राप्त मतके संख्या बह्रे सेकि ।
२०७१ सालमे हुइल एमालेके नवौं महाधिवेशनसे पहिलचो अध्यक्ष बनल ओली २०७५ सालमे माओवादी केन्द्रसँग हुइल पार्टी एकतापाछे फेन निरन्तर अध्यक्ष रहैं । एमाले ओ माओवादी केन्द्रके एकता गैल वर्ष फागुनमे अदालतके आदेशके कारण भंग हुइलपाछे एमाले १० औं महाधिवेशन करल हो ।
यी महाधिवेशनमे ओली सर्वसम्मत अध्यक्ष बने चाहल रहैं । पार्टीभित्तर टमान मनोविज्ञानके नेताहुक्रे रहल ओरसे ओइनहे व्यवस्थापन करना कटि ओली केन्द्रीय कमिटी अप्ने प्रस्तावित कैलैं ।
मने, उहाँक प्रस्ताव रावललगायतके नेता अस्वीकार करलपाछे एमाले महाधिवेशनमे चुनावके अवस्था सिर्जना हुइल हो । ओलीके गैल अँट्वार घोषणा करल सूचीअनुसार ढेर नेताहुक्रे निर्वाचनमे सर्वसम्मत चयन हुइलैं । मने, ओलीके अप्ने सर्वसम्मत हुइना इच्छा भर पूरा नैहुइल । उहाँ नेता भीम रावलसँग प्रतिस्पर्धा कैलैं ।
ओली यीआघेक नवौं महाधिवेशनमे नेता माधवकुमार नेपालहे ४६ मतके अन्तरमे हटाके विजयी बनल रहैं । यीचो रावलसँग भर उहाँक बरढेर मतअन्तर हुइल । ओली अपनहे निर्विकल्प मन्ले रहैं ।
यीआघे गोदावरीमे हुइल विधान महाधिवेशनसे ओलीहे निर्विकल्प नेतृत्वके माहोल बनाइल रहे । निर्विकल्प बन्ना नाममे पार्टीभित्तरके आन्तरिक लोकतन्त्रमे समेत अंकुश लगैना कोसिस हुइलपाछे ओलीविरुद्ध उम्मेदवारी परना स्थिति देखा परल हो ।
निर्वाचनमे केकर कत्रा मत ?
एमालेके १० औं महाधिवेशनमे पदाधिकारीमे सर्वसम्मत हुइ नैसेकलपाछे अध्यक्ष, उपाध्यक्ष ओ सचिवमे मतदान हुइल रहे । मतदानके अन्तिम मत परिणामअनुसार अध्यक्षमे केपी शर्मा ओली १८४० मत नानके निर्वाचित हुइल बटैं । अध्यक्षके प्रत्यासी भीम रावल भर २२४ मत प्राप्त करले बटैं ।
उपाध्यक्षमे अष्टलक्ष्मी शाक्य सर्वाधिक मत नन्नी । उहाँ १९८० मत प्राप्त कैलि । उपाध्यक्षमे निर्वाचित सुरेन्द्र पाण्डे १९२९, सुवास नेम्बाङ १८६९, विष्णु पौडेल १८५९, युवराज ज्ञवाली १८४६ ओ रामबहादुर थापा १७७१ मत प्राप्त कैलैं । उपाध्यक्षमे पराजति घनश्याम भुसाल ७२६ मत पैलैं ।
सचिवमे गोकर्ण विष्ट सर्वाधिक १९७८ मत, योगेश भट्टराई १९६४, टोपबहादुर रायमाझी १८०७, छविलाल विश्वकर्मा १८०६ ओ पद्मा अर्याल १८०३, लेखराज भट्ट १७०७, ओ रघुवीर महासेठ १५०३ मत नानके सचिव पदमे निर्वाचित हुइलैं । सचिवमे पराजित भीम आचार्य ७८९ सय ओ टंक कार्की ५६० मत प्राप्त कैलैं । वरिष्ठ उपाध्यक्षमे ईश्वर पोखरेल ओ उपमहासचिवमे प्रदीप ज्ञवाली, पृथ्वी सुब्बा गुरुङ ओ विष्णु रिमाल सर्वसम्मत चयन हुइलैं ।
