नेपाली काँग्रेस सुदूरपश्चिम प्रदेश अधिवेशनके सम्पुर्ण तयारी पुरा

पहुरा समाचारदाता
धनगढी,१६ अगहन । कैलालीके धनगढीमे आयोजना हुइना पहिल सुदूरपश्चिम प्रदेश अधिवेशनके तयारी पुरा हुइल बा । अगहन १६,१७ ओ १८ गतेसम धनगढीके ओम प्यालेस चल्न प्रदेश अधिवेशनके सम्पुर्ण तयारी पुरा हुइल सुदूरपश्चिम अधिवेशन प्रचार–प्रसार समितिका संयोजक नृप सुनार बटैलै ।

जौन अन्तरगत सुदूरपश्चिम प्रदेशके ९ जिल्लाके प्रदेश प्रतिनिधिहुकनके आवासके लाग स्थानीय टमान होटेल तथा लजमे १ हजार बेडके व्यवस्थापन हुइटी रहल संयोजक सुनार जानकारी डेलै । उहाँक अनुसार मञ्च व्यवस्थापन, व्यानर, झण्डा, पोष्टर मम्पेलेट, स्वयम् सेवक परिचालन ओ प्रचार–प्रसार लगायत सक्कु तयारी हुइटी रहल बा । अधिवेशनमे सुदूरपश्चिम प्रदेशके ९ ठो जिल्लासे ९ सय ७२ जाने प्रदेश प्रतिनिधि मतदाताके रुपमे रहल बटै ।

ओस्टेक अधिवेशनके आज दुपहर २ बजे प्रधानमन्त्री तथा नेपाली काँग्रेसके पार्टी सभापति शेर बहादुर देउवासे भर्चुअल माध्यमसे उदघाटन कैना कार्यक्रम रहल पहिल सुदुरपश्चिम प्रदेश अधिवेशन प्रचार प्रसार समिती जनैले बा । अधिबेशनके कार्यतालिका अनुसार आज सकारे ८ः३० बजेः ९ अछाम, बाजुरा, बझाङ, डडेल्धुरा, बैतडी, कन्चनपुर, दार्चुला डोटी जिल्लाके सहभागीके दर्ता तथा कैलाली जिल्लाके दुपहर १२ः०० बजेः सहभागीके दर्ता कार्य हुइटी बा । ओस्टेक दुपहर १ः३० बजेः नेपाली काँग्रेस सुदूरपश्चिम प्रदेश अधिवेशनके उदघाटन कार्यक्रम प्रारम्भ ओ दुपहर २ः०० बजेः प्रधानमन्त्री तथा नेपाली काँग्रेसके पार्टी सभापति शेर बहादुर देउवासे उद्घाटन कार्यक्रम रहल नेपाली काँग्रेस जनैले बा ।