‘ओमिक्रोन’ फैले नैडेहक लाग सुदूरपश्चिमके नाकामे कडाइ
पहुरा समाचारदाता
धनगढी, १६ अगहन । दक्षिण अफ्रिकालगायत टमान देशमे फैलल कोभिड–१९ के लावा भेरियन्ट ‘ओमिक्रोन’ के खतरा बह्रल ओरसे सुदूरपश्चिम प्रदेशमे फेन उच्च सतर्कता अपनाइल बा ।
भारतसँग सीमा जोरल नाकामे कडाइ करे लागल सुदूरपश्चिम स्वास्थ्य निर्देशनालय जनैले बा । भारतमे ओमिक्रोनके सङ्क्रमण फैललेसे सबसे ढिउर जोखिममे सुदूरपश्चिम पर्ना रहल ओरसे सीमा नाकामे कडाइके साथ स्वास्थ्य जाँच करे लागल सुदूरपश्चिम स्वास्थ्य निर्देशनालयके निर्देशक डा. गुणराज अवस्थी बटैलै ।
सुदूरपश्चिमके भारतसँग सीमा जोरल मुख्य नाका गड्डाचौकी, त्रिनगर, झुलाघाट, पुलघाटलगायत नाकामे उच्च सतर्कता अपनाइल हो । इ नाकासे आवागमन ढिउर हुइना करल बा । पहिल चरणके कोरोना सङ्क्रमण फैलेबर परीक्षणके दायरा बह्राइल ओ डुसरा चरणमे अक्सिजन आपूर्ति करल ओरसे आब इ लावा भेरियन्ट कैसिन रुप लेहठ ओहे अनुसार थप तयारी करजैना उहाँके कहाइ रहे ।
सुदूरपश्चिममे पूर्णरुपमे खोप लगैना कार्यसमेत सम्पन्न नैहुइल कारण झनै सङ्क्रमण फैलना खतरा बह्रल बटाजाइठ् । स्वास्थ्य सुरक्षाके मापदण्ड फेन पूरा कैना बेवास्ता हुइटी रहल बेला ओमिक्रोनके सङ्क्रमण फैललेसे नियन्त्रण कैना थप समस्या हुुइना हुइल बा । सरकारके ओरसे खोप आपूर्तिमे कमी नैहुइल ओरसे सक्कु जनहनहे पूर्ण खोप लगैना समेत आग्रह करल बा ।
सुदूरपश्चिम प्रदेश सरकारसे सक्कु जनहनहे मास्क अनिवार्य लगैना, सामाजिक दूरी कायम कैना ओ साबुन वा स्यानिटाइजरके अनिवार्य प्रयोग कैना नागरिकहे आग्रहसमेत करल बा । राजनीतिक दल तथा सरकारके उच्च ओहोदामे बैठल व्यक्तिनसे स्वास्थ्य मापदण्डके नियमके उल्लङ्घन हुइबर सार्वसाधारण नागरिकहे नियम पालना करैना समस्या हुइना करल ओरसे सक्कु जाने मापदण्ड पालना करे पर्नामे जोड डेहल बा ।
ओमिक्रोन फैललेसे फेन सघन उपचार कक्ष, भेन्टिलेटर, अक्सिजन प्लान्टलगायत आवश्यक उपकरण जडान हुइल ओरसे पहिलेके जैसिन समस्या नैहुइना स्वास्थ्य निर्देशनालय जनैले बा । सुदूरपश्चिम प्रदेशमे हालसम ४८ हजार ३९ जनहनमे कोरोना पुष्टि हुइबर ६०९ जनहनके मृत्यु हुइल रहे । विश्वस्वास्थ्य सङ्गठनसे कोभिड–१९ लावा भेरियन्ट ओमिक्रोन पत्ता लागलसंगे नेपालहे उच्च सतर्कता अपनैना सुझाव डेहल रहे ।
