लोकतन्त्र जोगैना काँग्रेस नेतृत्वमेः कानून मन्त्री बडु
पहुरा समाचारदाता
धनगढी, १६ अगहन । नेपाली काँग्रेस सुदूरपश्चिम प्रदेश अधिवेशन सुरु हुइल बा । धनगढीके ओम पार्टी प्यालेसमे प्रदेश अधिवेशन सुरु हुइल हो । अधिवेशनके पार्टी सभापति तथा प्रधानमन्त्री शेरबहादुर देउवा भच्र्युअल माध्यमसे उदघाटन करल रहिट ।
उदघाटन सत्रमे काँग्रेसके नेता तथा कानून मन्त्री दिलेन्द्रप्रसाद बडू केपी ओली अब्बे सत्तामे रहल हुइलेसे काँग्रेसके अब्बे हुइटी रहल अधिवेशन नइहुइना दावी करलै । ‘केपी ओली सत्तामे रहलेसे संविधानमे रहल व्यवस्था सक्कु खारेज हुइट,’उहाँ कहलै ‘कम्युनिष्टहुकनहे जनतासे डेहल दुई तिहाई जनमतके कदर हुई नइसेक्के आज प्रतिपक्षमे रहल काँग्रेससे राज्यके नेतृत्व लेहल बा ।’ मुलुकके परिवर्तनके लाग काँग्रेसके जबफे खाँचो रहल नेता बडू बटैलै ।
‘केपी ओलीसे संसद विघटन करके ताजा जनादेश हो कहल रहे । मने पाँच बरस नइविटटसम ताजा जनादेश खोज्न ठाउँ नइहो,’ कानून मन्त्री बडू कहलै, ‘यी संविधानसे डेहल एक चो के जनादेश पाँच बरस ताजा रहठ । पाँच बरसपाछे केल ताजा जनादेश खोजी कैना व्यवस्था बा ।’ सरकारके नेतृत्व करेबेर नेपाली काँग्रेसके दायित्व लौवा निर्वाचन कैना रहल उहाँ बटैलै । पार्टीके आघे राष्ट्रिय, संविधान, लोकतन्त्र जोगैना स्थानीय, प्रदेश ओ संघीय चुनाउ कैनासमेत दायित्व रहल उहाँ बटैलै ।
उदघाटन कार्यक्रममे स्वागत आयोजक समिति संयोजक नर नारायण शाह‘मनु’ ओ संचालन प्रचार प्रसार संयोजक नृप सुनार करले रहिट । निर्वाचन समिति संयोजक विरबहादुर जेठारा सक्कु जिल्लाके प्रतिनिधिके नामावली टाँस करल बटैलै । प्रदेश अधिवेशनके लाग शुकके मनोनयन ओ शनिच्चर निर्वाचन हुइना कार्यतालिका रहल बा ।
महाधिवेशनमे भाग लेहे प्रदेशके ९ जिल्ला कैलाली, कञ्चनपुर, बाजुरा, बैतडी, डडेल्धुरा, दार्चुला, डोटी, बझाङ ओ अछामके प्रतिनिधिहुक्रे धनगढी पुसेकल बटै ।
सुदूरपश्चिममे काँग्रेसके ९ सय ७२ जाने प्रतिनिधि रहल बटै । कांग्रेसके सुदूरपश्चिम प्रदेश सभापतिके लाग आकांक्षी कांग्रेस नेताहुक्रे दौडधुप तीव्र बनैले बटै । आकांक्षीहुक्रे उम्मेदवारी घोषणा करके प्रचारप्रसारमे जुटल बटै ।
के–के बटै प्रदेश सभापतिके आकांक्षी ?
प्रदेशमे नेपाली काँग्रेससे पूर्वसंघीय राज्यमन्त्री, सुदूरपश्चिम प्रदेश सभा सदस्य, जिल्ला सभापतिहुक्रे, युवा तथा विद्यार्थी नेताहुकनके सभापतिमे इच्छा डेखैले बटै ।
कैलाली जिल्ला सभापति नरनारायण शाह ‘मनु’, पूर्व परराष्ट्र राज्यमन्त्री तथा बझाङके काँग्रेस नेता अर्जुनजंगबहादुर सिँह, नेपाल विद्यार्थी संघके पूर्व केन्द्रीय उपाध्यक्ष तथा डोटीसे विजयी महाधिवेशन प्रतिनिधि पुष्प शाही, पूर्व सञ्चार राज्यमन्त्री तथा अछामके काँग्रेस नेता गोविन्दबहादुर शाह, सुदूरपश्चिम प्रदेशसभा सदस्य गोविन्द बोहरा ओ कैलालीके हिमबहादुर रावल प्रदेश सभापतिमे दाबेदारी पेश करले बटै ।
सभापतिके दाबेदार सक्कु संस्थापन पक्षके हुइट । सुदूरपश्चिम प्रदेश अधिवेशनके लाग कांग्रेससे कानुनमन्त्री दिलेन्द्रप्रसाद बडूहे संयोजक तोक्के खटैले बा । उहाँ प्रदेश सभापतिके लाग सर्वसम्मतके प्रयास कैना जनैलै ।
