लवाङ्गी सांस्कृतिक कार्यक्रम सुरु
पहुरा समाचारदाता
धनगढी, १६ अगहन । कैलालीके गौरीगंगा नगरपालिका–१०, सुन्दरपुरमे बिफेक रोजसे चौठा लवाङ्गी सांस्कृतिक कार्यक्रम–२०७८ सुरु हुइल बा ।
कार्यक्रमके उद्घाटन राष्ट्रिय सभा सदस्य हरिराम चौधरी (उत्सव) कैले रहिट । थारु गुरुवा बदैवा समाज सेवा समिति कैलालीके अध्यक्ष गोपालदास चौधरीके घरगोसियामे हुइल कार्यक्रममे विशेष पहुनामे गौरीगंगा नगरपालिका वडा नम्बर १० के वडाध्यक्ष पदमबहादुर ऐर, वडा नम्बर ११ के वडाध्यक्ष विनोदकुमार चौधरी रहल रहिट ।
उ अवसरमे नेपाल टेलिकमसे निःशुल्क मोवाइल सिम वितरण कैना जनागिल बा । अगहन १६ ओ १७ गते कार्यक्रममे नेपाली टेलिकमसे निःशुल्क वितरण कैना कार्यक्रमके मिडिया संयोजक दिनेश दहित जानकारी डेलै ।
नेपाल टेलिकम अत्तरियाके क्षेत्रीय निर्देशक नामाकार न्यौपाने ओ लवाङ्गी सांस्कृतिक कार्यक्रम २०७८ के मिडिया संयोजक दिनेश दहित बीच कार्यक्रममे निःशुल्क सिम उपलब्ध कराइल लाग मंगरके सम्झौता हुइल रहे ।
टेलिकमसे लवाङ्गी सांस्कृतिक कार्यक्रमके लाग पाँच सय निःशुल्क सिम उपलब्ध करैना सम्झौतामे उल्लेख रहल संयोजक दहित जानकारी डेलै । उहाँक अनुसार निःशुल्क सिम लेना व्यक्ति नागरिकताके प्रतिलिपि ओ एक प्रति फोटो नाने पर्ना बटाइल बा ।
‘भाषा, कला संस्कृति हमार पहिचान, थारु वैदिक गुरुवा प्रशिक्षण केन्द्रसंगे थारु संग्राहलय बनैना हमार अभियान’ कना मूल नारा सहित यिहे अगहन १६ ओ १७ गते कार्यक्रम हुइना बा । साथे कार्यक्रममे कलाकारहुकनके फे वेजोड प्रस्तुति रहना जनाइल बा ।
कलाकारमे थारु लोक गायक मनिराम चौधरी, मोडल महिमा कुश्मी, सुनिता चौधरी, वीर चौधरी, घोडाघोडी नाट्य समूहके नाच, फुलकुमारी, गायक राजु चौधरी, गायिका संगीता चौधरीके बेजोड प्रस्तुति रहना मिडिया संयोजक दिनेश दहित जनैलै ।
ओस्टेक, आदर्श महतो डान्स ग्रुप, आइसा चौधरी, गायक खुशी रत्गैया, अञ्जन चौधरी, तुफान चौधरीकेफे वेजोड प्रस्तुति रहन मिडिया संयोजक दहित जानकारी डेलै । थारु गुरुवा बदैवा समाज सेवा समिति कैलालीके आयोजनामे हुइना कायक्रमहे टमान संघसंस्थासे सहकार्य करले बटै ।
