कांग्रेस सुदूरपश्चिम प्रदेश अधिवेशनके तालिका हेरफेर
पहुरा समाचारदाता
धनगढी, १७ अगहन । नेपाली काँग्रेस सुदूरपश्चिम प्रदेशके मनोनयन दर्ता कार्यतालिका बडलल बा । प्रथम सुदूरपश्चिम प्रदेश अधिवेशनके सर्वसम्मतके प्रयासके लाग कुछ समय परिवर्तन करल हो । बिहान ८ बजेसे ११ बजेसम मनोनयन दर्ता कार्यतालिका रहलमे उम्मेदवारके मनोनयन पत्र दर्ता आज दिनके २ बजेसे ४ बजे कैजाइ ।
ओस्टेक, मनोनयन पत्र उप्पर पर्न दावी, विरोध दर्ता करना, जाचबुझ करना ४ः३० बजे से ५ बजे, उ उपर निर्णय ५ः३०, उम्मेदवारके नेपाली वर्णनुक्रम (देवानगरी, लिपि) पहिल नाम प्रकाशित कैना ५ः३० बजे कायम करल बा ।
ओस्टेक, मनोनयन फिर्ता लेना ५ः३० से ६ः३० बजे, अन्तिम नामवली प्रकाशन साँझके ७ः३० बजे ओ मतदान काल्ह बिहानके ८ बजेसे तोकल बा । प्रदेश कार्यसमितिके लाग सभापति १, उपसभापति २, महामन्त्री २, सहमहामन्त्री ३ (१ महिलासहित) ओ प्रदेश सदस्य ५१ जाने रहल बटैं ।
प्रदेश सभापतिके लाग नेता वीरबहादुर बलायरहे सभापति सर्वसम्मत रूपमे बनैना प्रयास हुइटि बा । यद्यपि प्रदेश सभापतिके आकांक्षी कैलाली सभापति नरनारायण शाह ओ अछामके गोविन्दबहादुर शाह सहमत नैहुइट । उहाँहुक्रे सभापति पदसे पाछे हट्ना मनसायमे नैहुइट ।
यीआघे, सुदूरपश्चिम प्रदेश सभापतिके लाग पूर्वराज्यमन्त्री गोविन्दबहादुर शाही (अछाम), पूर्वराज्यमन्त्री तथा राजदूत अर्जुनजंग बहादुर सिंह (बझाङ), कैलाली जिल्ला सभापति नरनारायण शाह, कैलाली निर्वाचन क्षेत्र नम्बर २ के महाधिवेशन प्रतिनिधि हिमबहादुर रावल, सुदूरपश्चिम प्रदेशसभा सदस्य गोविन्दबहादुर बोहरा ओ डोटीके महाधिवेशन प्रतिनिधि पुष्पकुमार शाही उम्मेदवारी घोषणा कैसेक्ले बटैं ।
