काँग्रेस प्रदेश सभापतिमे मिश्र ओ बलायकके टक्कर

पहुरा समाचारदाता
धनगढी, १७ अगहन । काँग्रेस सुदूरपश्चिम प्रदेश सभापति शेरबहादुर देउवा ओ वरिष्ठ नेता रामचन्द्र पौडेल पक्षबीच प्रतिष्पर्धा हुइना हुइल बा । प्रदेशके प्रथम अधिवेशनमे देउवा ओ पौडेलबीच दुई प्यानल खडा हुइल बा ।

बिफेकरोजसे दुई काँग्रेस सुदूरपश्चिमके नेताहुक्रे सर्वसम्मति प्रदेश समिति चयन कैना प्रयास कैलेसे फेन सफल हुइ नैसेकल । देउवा प्यानलके वीरबहादुर बलायर ओ पौडेल पक्षके नारायण मिश्र प्यानल बनाके शुकके रोज उम्मेदवारी दर्ता करैले बटैं ।

बलायरके टीमसे उपसभापतिमे बैतडीके नेता लोकराज अवस्थी ओ कैलालीके जनक चौधरी, महामन्त्रीमे कैलालीके नरनारायण शाह (मनु) ओ अछामके मेखराज खडका, सहमहामन्त्रीमे कञ्चनपुरके चिन्तामणी भट्ट, गोपाल भट्ट ओ अछामके अम्बिका चलाउने उम्मेदवारी दर्ता करैले बटैं ।

मिश्रके टीमसे उपसभापतिमे कञ्चनपुरके गोपाल गुरुङ ओ बाजुराके मानबहादुर रावल, महामन्त्रीमे बझाङके प्रताप गुर्धामी ओ रामबहादुर शाही, सहमहामन्त्रीमे नरेन्द्र रोकाया ओ नरेन्द्र भट्ट उम्मेदवारी दर्ता करैले बटैं ।

प्रदेशमे तीन जिल्ला सभापतिमे पौडेल पक्ष निर्वाचित हुइल बा कलेसे चार जिल्लामे देउवा पक्षके जिल्ला सभापति रहल बटैं । प्रदेशके दुई जिल्लामे अधिवेशन स्थगित करल बा । ‘प्रदेशके सभापतिमे कैलाली पार्टी सभापति नरनारायण शाह (मनु) प्रतिष्पर्धा कैलेसे उहाँ दुई प्यान हुइट,’ एक नेता कलैं, ‘‘उहाँ पाछे हटलबाद यहाँ गुटउपगुटके राजनीति हुइल बा ।’

प्रधानमन्त्री शेरबहादुर देउवाके विशेष पात्र मानल रमेश लेखक, एनपी साउँद ओ पौडेल खेमाके नेता दिलेन्द्रप्रसाद बडुबीच बिफेक रोजसे टमान चरणमे छलफल हुइल रहे । सभापतिमे बलायरहे बनैना प्रयास हुइलपाछे मनोनयन कार्यतालिका समेत सारल रहे । शुके बिहान ८ बजेसे ११ बजेसम मनोनयन दर्ता कार्यतालिका रहे । सर्वसम्मत रुपमे बनैना छलफल जारी रहल ओरसे उम्मेदवारके मनोनयनपत्र दर्ता कैना समय दिनके २ बजेसे ४ बजेसम तोकल रहे ।

नेताहुक्रे सबके जोड सभापति लरेपरल कना हुइलपाछे अपने सभापतिके उम्मेदवार बनल बलायर बटैलैं । ‘काँग्रेसके नाममे कम्युनिष्टमे भोट डरना प्रवृत्ति अन्त्य करना ओ सुदूरपश्चिममे कांग्रेसके संगठनहे सशक्त बनैना मोर उम्मेदवारी हो,’ बलायर संञ्चारकर्मी संग कलैं ।

ओस्टेक संस्थापन इतर पक्षसे प्रदेश सभापतिमे उम्मेद्वारी डेहल नारायणदत्त मिश्र अपन पार्टीमे पुगाइल योगदानके आम मतदाताहुक्रे सम्मान कैना बटैलैं । सहमतीके लाग कोइ फेन बाट नैकरल उहाँ दावी करलैं ।

यीआघे संस्थापन अर्थात देउवा पक्षसे नरनारायण शाह, गोविन्द बोहरा, गोविन्दबहादुर शाह, अर्जुनजंगबहादुर सिंह, हिमबहादुर रावल ओ पुष्प शाही सभापतिमे दाबी कैले रहैं । बलायरहे आघे सारलपाछे सब पाछे हटल काँग्रेस जनैले बा । शनिच्चर (काल्ह) दुई निर्वाचन हुइना बा । प्रदेशके ९ ठो जिल्लामे ९ सय ७२ महाधिवेशन प्रतिनिधि एवं मतदाताहुक्रे रहल बटैं ।