११ करोड ३९ निक्षेप संकलन

पहुरा समाचारदाता
धनगढी, १९ अगहन । नवज्योति कृषि सहकारी संस्था लिमिटेडसे २०७८ सालके असार मसान्तसम ११ करोड ३९ लाख ४२ हजार ४५ रुप्या निक्षेप संकलन कैना सफल हुइल बा ।

शनिच्चर धनगढीमे हुइल १३औ बार्षिक साधारणसभामे संस्थाके अध्यक्ष सीताराम राना गैल बर्षके निक्षेप रु ७ करोड ५ लाख १८ हजार २१ रुप्या ८८ पैसा रहलमे एक बर्षमे ११ करोड ३९ लाख ४२ हजार ४५ रुप्या निक्षेप संकलन कैना सफल हुइल बटैलै ।

संस्थासे आर्थिक बर्ष २०७६/०७७ के असार मसान्तसम्मम ६ करोड ७ लाख ६७ हजार ७ सय २६ रुप्याके कर्जा प्रवाह करल रहे कलेसे आर्थिक बर्ष २०७७/०७८ मे बृद्धि करके ८ करोड ५१ लाख ४५ हजार २ सय ६१ रुप्या लगानी करल उहाँ बटैलै ।

बार्षिक प्रगति प्रतिवेदन प्रस्तुत करटी उहाँ सहकारी संस्थाके आय स्रोत कहल कर्जा लगानीसे प्राप्त व्याज, रसायानिक मल विक्री, विउ, विजन विक्रीसे रहल बटैलै । आर्थिक बर्ष २०७७÷०७८ के कारोवारसे ७ लाख ८९ हजार ४ सय ३८ रुप्या २८ पैसा शुद्ध नाफा आर्जन कैना सफल हुइल अध्यक्ष जनैलै ।

२०६७ अगन ४ गते स्थापना हुइल यी सहकारीके हालसम ६ सय ४२ जाने शेयर सदस्य रहल बटै ।

ओस्टेक, करके सहकारीके १३औ बार्षिक साधारणसभाके उदघाटन कार्यक्रमके वडका पहुना सुदूरपश्चिम प्रदेशके प्रदेश प्रमुख देवराज जोशी रहल रहिट । कार्यक्रमके उदघाटन करटी उहाँ अब्बे ढेर जैसिन सहकारीमे विकृति विसंति रहल ओरसे निम्न बर्गिय जनताके निम्ति सेवा सुविधा डेना ओ सहकारीके उद्देश्यहे पुरा करके आघे बह्रना आग्रह करलै ।

प्रदेशसभा सदस्य मालामति राना सहकारीके स्थापनापाछे बैंकके ऋणसे मुक्ति पैनाके साथे महजानी प्रथाके समेट अन्त्य हुइल बटैली । उहाँ कहली, बैंकसे ऋण लेना ढेर झझट हुए । निकारल करिब आधा रुप्या अधिया हुके जाए । सहकारीके स्थापना हुइलपाछे सक्कु झंझट मुक्त हुइल बा ।’ अपने किसानके छाई पटुहिया रहल ओरसे किसानके सक्कु पीडा भोगल ओरसे प्रदेश सरकारहे मलखादके समस्या समाधान कैना उहाँ आग्रह करली ।

संघीय सरकारसे सौतेली व्यवहार करल कहटी, प्रदेश सरकारसेफे उहे व्यवहार पाइल प्रदेशसभा सदस्य राना बटैली । नेपाल भारत रोटी बेटीके सम्बन्ध रहल कहटी नाका बन्द नाही तस्कारी, लागु औषध रोकेक लाग विओपी पोष्ट संख्या बढैना उहाँ बटैली । ओस्टेक करके उहाँ नवज्योति कृषि सहकारी संस्था लिमिटेडके भवनमे एक तल्ला थपके सहयोग कैना प्रतिबद्धताफे जनैली ।

संविधानसभा सदस्य तथा नवज्योति कृषि सहकारी संस्था लिमिटेडके सल्लाहकार प्यारेलाल राना यी संस्थासे कम समयमे उत्साहजनक प्रगति कैना सफल हुइल बटैलै । पहिले–पहिले सहकारीसे १८ प्रतिशत व्याजमे कर्जा प्रवाह करलमे अब्बे १४ प्रतिशतमे झरल बटैलै । घरेम पैसा थुपारके रखसेफे सहकारीमे बचत करेलेसे व्याज प्राप्त कैना उहाँ बटैलै ।

जिल्ला सहकारी संघके जिल्ला अध्यक्ष फणिराज सापकोटा सहकारी संस्था विधान सम्वत नइचल्के जोखिममे परटी गैल बटैलै । सहकारीसे गाउँके साहु महाजनसे छुटकरा डेहुवाइल कहटी शेयर सदस्यहुकनहे व्यावसायिक बने पर्ना उहाँ बटैलै ।

धनगढी उपमहानगरपालिका सहकारी शाखाके प्रमुख हरिसिंह साउद सहकारीसे बैंकके चर्को व्याज ओ आर्थिक शोषणसे उन्मुक्ती डेहुवाइल बटैलै । उहाँ कहलै, किसानसे सयकडा ३ रुपिया व्याज तिर्ना बाध्य रहिट । यदि सहकारीके स्थापना नइहुूइल रहटे बैंकके व्याज झन चर्को हुइटी जाइट ।’

कार्यक्रममे शेयर सदस्य कौशिला राना किसान सक्कु ओरसे मारमे परल बटैली । बर्खेबाली, हिउदेबालीके लाग समयमे मल नइपैना किसानके भारी पीडा रहल उहाँ बटैलै । बेमौससमी पानीके कारण किसान मारमे परल मने सरकारसे राहातके लाग कुछ सुनुवाई नइकरल दुखेसो उहाँ पोख्ली ।

शेयर सदस्य भङगी राना फे नेपाल सरकारसे मल उपलब्ध कराई नइसेक्लेसे किसानहे भारतसे व्यावहरिक रुपमे मल नाने डेहे पर्ना आग्रह करलै । उहाँ कहलै कानूनमे खुल्ला रुपमे मल नइपैना व्यवस्था रहलेसेफे सरकारसे अपने उपलब्ध कराइसेकल अवस्थामे व्यावहारिक रुपमे भारतसे मल नाने डेहे परल । सरकारसे तोकल मुल्यमे किसानसे धान विक्री करे नइपैना मने सरकारके तोकल मोलमे मल खरिदे पर्ना ओरसे किसान दुनु ओरसे पीडित रहल बटैलै ।

१३ औ बार्षिक साधारणसभा संस्थाके अध्यक्ष सीताराम रानाके अध्यक्षतामे हुइल रहे । कलेसे स्वागत मन्तव्य उपाध्यक्ष मेघनाथ राना ओ संचालन सचिव भिराराम राना करले रहिट । ओस्टेक करके संस्थासे १३औ बार्षिक साधारणसभाके अवसरमे अपन कर्मचारी ओ असल ऋणीहुकनहे सम्मान करले बा ।

सम्मानित हुइलमे विरेन्द्र राना, जयलाल राना, लक्ष्मी राना, कौशिला राना, शारदा प्रसाद राना, पृथ्वी राना, मंगल चौधरी, लाल राना, कृष्णकुमार राना, माधवराज राना, रामसिंह चौधरी, रामलाल राना, राजेश राना रहल बटै । ओस्टेक असल ऋणी जगतराम चौधरी ओ परशुराम कठरियाहेफे सम्मान करल बा ।