आजसे घोडाघोडीमे लवाङ्गी पूजा
पहुरा समाचारदाता
पहलमानपुर, २० अगहन । कैलालीके घोडाघोडीमे आज (सोम्मार) से हुइना लवाङी पूजा तथा सांस्कृतिक महोत्सवके तयारी पुरा हुइल बा ।
अगहन २० से २२ गते सम सञ्चालन हुइना घोडाघोडी लवाङी पूजा तथा सांस्कृतिक महोत्सव कार्यक्रमके सक्कु तयारी पुरा हुइल आयोजक जक घोडाघोडी तथा सांस्कृतिक संरक्षण समाज जनैले बा ।
महोत्सवके उदघाटन सुदूरपश्चिम प्रदेशके मुख्यमन्त्री त्रिलोचन भट्टसे कैजैना जनागिल बा ।
थारु समुदायके संस्कृति जगेर्ना कैना उद्देश्यसे हरेक वर्ष मार्ग शुक्ल पञ्चमी अर्थात् विवाह पञ्चमीके दिन यी पूजाहे विशेष महत्वके साथ मनैना करल महोत्सव मूल आयोजक समितिके संयोजक बुधराम चौधरी बटैलै ।
यी पर्वमे विशेष करके थारु समुदायसे नयाँ बाली भित्रया सेकलपाछे उ अन्नबालीहे प्रसादके रूपमे देवी देउताहुकन ल्यवाङी चढैना करजाइठ । यकर साथे उहे दिन पञ्चतत्व अर्थात् प्रकृतिके फे पूजा करजाइठ । कलेसे घोडाघोडीके मुख्य मन्दिरमे मुरगी, छेगरा, सुँगुर लगायतके बलिफे चढैना करजाइठ ।
बलि डेना कार्यमे भर थारु केल नइहुके गैर थारु समुदायहुकनकेफे घनके सहभागिता हुइना करठ । कैलालीके ८२ गाउँ सहित कञ्चनपुर, दाङ, बाके, बर्दिया लगायतके जिल्लासेफे दर्शनार्थी अइना करल बटै ।
