प्रविधिमैत्री पढाई आवश्यकः नगरप्रमुख चौधरी
जीवन चौधरी
पहलमानपुर, २२ अगहन । घोडाघोडी नगरपालिकाके नगरप्रमुख ममताप्रसाद चौधरी नगरभिटर रहल सक्कु विद्यालयहे गुणस्तरीय बनाइक लाग प्रविधिमैत्री पढाईमे जोड डेहल रहिट ।
घोडाघोडी नगरपालिका–१० मे रहल अमर सहिद आधारभूत विद्यालयके मंगरके रोज हुइल अभिभावक भेला, लेखापरीक्षण तथा सम्मान कार्यक्रमके बर्का पहुना रहल उहाँ गुणस्तरीय शिक्षा डेहक लाग प्रविधिमैत्री पढाईमे जोड डेहल रहिट । उहाँ कहलै, नगरपालिकाहे शैक्षिक नगरी घोषणाके लाग हम्रे जोरसे तयारी करटी रहल बाटी । नगरपालिकाहे साक्षर नगरपालिका घोषणाके लाग गठित नगर साक्षारता अभियान अन्तर्गत कार्यक्रम आगे बह्रल बा ।
अगहन २० से २४ गतेसम सक्कु वडामे वडाध्यक्षके अध्यक्षतामे वडास्थित राजनैतिक दलके प्रतिनिधि, शिक्षासंग सरोकार रख्ना सरोकारवालाहुकनके सहभागितामे साक्षारता नगरपालिका घोषणा पूर्व तयारी कार्यक्रम संचालन करल उहाँ बटैलै ।
संविधान सभा सदस्य तथा विद्यालयके संस्थापक कृष्णकुमार चौधरी (कुण्डन) द्वन्द्वकालमे पीडितहुकनके लर्कनहे पह्राइक लाग विद्यालयके स्थापना कैगिल हो । अपने विद्यालयहे मावि स्तरसम पुगैना स्थापना करल उहाँ बटैलैं । उहाँ कलैं, ‘यी विद्यालय अब्बे आधारभूततहसम यिहिहे मावि तहसम पुगैना हमार पहल रहि ।
घोडाघोडी नगरपालिका–९ के अध्यक्ष भीम बम विद्यार्थीनके भविष्य बनैना अभिभावहे ध्यान डेहे पर्ना बटैलै । बोडिङमे पह्रना लरकनहे मजासे हेरना मने सामुदायिक विद्यालयमे पह्रना लर्कनहे अभिभावसे ध्यान नइडेहल उहाँ बटैलै । शिक्षक ओ अभिभावकके सहयोगसे सरकारी विद्यालयहे बोडिङ जस्टे बनाइसेक्ना अध्यक्ष बम बटैलै ।
कान्तिराज्यलक्ष्मी माविके व्यवस्थापन समिति अध्यक्ष खडक रावत विद्यालय सुधारके लाग शिक्षक अभिभावक, राजनैतिक दल, सरोकारवालाके भूमिका अपरिहार्य रहल बटैले रहिट ।
कार्यक्रममे विद्यालयके शिक्षक रमेश चौधरी ३३ लाख ९ हजार ७ सय ४७ रुप्या ५८ पैसा बराबरके आयव्यय प्रस्तुत करले रहिट ।
अमर सहिद आधारभूत विद्यालयके व्यवस्थापन समिति अध्यक्ष नैनबहादुर चौधरीके अध्यक्षतामे हुइल कार्यक्रममे उहाँ विद्यालयहे नमुना विद्यालय घोषणा करेक लाग स्थानीय, प्रदेश ओ संघीय सरकारसे पहल करटी रहल बटैलै । उहे अवसरमे संस्थापक अध्यक्ष, व्यवस्थापन समिति अध्यक्ष, समाजसेवी, राजनैतिक दलके प्रतिनिधि, क्लवके अध्यक्ष, भल्मन्सा, बुद्धिजीवीहुकनके सम्मान कैगिल रहे ।
कार्यक्रमके संचालन विद्यालयके प्रअ खुशीराम चौधरी ओ स्वागत मन्तव्य विद्यालय व्यवस्थापन समिति सदस्य पूर्णा बडुवाल करले रहिट । विद्यालय विक्रम सम्वत् २०६५ सालमे दर्ता हुइल रहे ।
