लाइसेन्स नैरहल अटोरिक्साहे कारवाही

पहुरा समाचारदाता
धनगढी, २३ अगहन । कैलालीके अत्तरियामे लाइसेन्स नैरहल १ सय ३२ अटोरिक्सा कारवाहीमे परल बा । सुदूरपश्चिम प्रदेश ट्राफिक प्रहरी कार्यालय एक्केदिन १ सय ३२ अटोरिक्साहे कारवाही करले बा । अत्तरिया बजारमे आवश्यक कागजात बिना संचालमे रहल अटोरिक्सा मंरके रोज कारवाही रहल हो ।

कारवाहीसे ट्राफिक प्रहरी ६६ हजार राजश्व संकलन करले बा । ट्राफिक प्रहरी विद्युतीय ओ पेट्रोलवाला अटोरिक्सा चालकसँग लाइसेन्स लगायत आवश्यक कागजात नैरहलहे कारवाही करले रहे ।

लाइसेन्स बनैना आग्रह करलेसे फेन बेवास्ता कैके लाइसेन्स बिना सञ्चालन करलपाछे जरिवाना करल प्रदेश ट्राफिक प्रहरी कार्यालय अत्तरियाके प्रमुख बामदेव गौतम बटैलैं ।

ओहोर अटोरिक्सा व्यवसायीहुक्रे भर तत्काल लाइसेन्स बनाइ नैसेक्ना हुइल ओरसे कारवाही करना अव्यवहारिक हुइल बटैले बटैं । कारवाही करे लागलपाछे मंगरके रोज आक्रोशित अटोरिक्सा चालकहुक्रे अत्तरियाके पूर्व रोडमे ट्राफिक पोष्ट आघे सडक चक्काजाम करनाके साथे प्रदेश ट्राफिक कार्यालय घेराउ करले रहैं ।