‘युट्युबहे च्यानलहे व्यवस्थित कैना आवश्यक’
पहुरा समाचारदाता
धनगढी, २३ अगहन । प्रेस काउन्सिल नेपालके अध्यक्ष बालकृष्ण बस्नेत युट्युबहे च्यानलहे व्यवस्थित कैना आवश्यक रहल बटैले बटै ।
बुधके रोज धनगढीमे आयोजित पत्रकार आचारसंहिता जागरण ओ मिडियाके जनगुनासो सुनुवाई कार्यक्रममे बोल्टी अध्यक्ष बस्नेत युट्युबहे व्यवस्थित करे पर्ना बटैले रहिट । उहाँ कहलै, युट्युब च्यानलहे सूचना विभागमे दर्ता कर भरमे ओम्ने काम कैना व्यक्तिहे पत्रकार माने नइसेक्जाई । सूचना विभागमे युट्युब मिडिया दर्ता करके विधि प्रक्रियामे नइजैना कौनोफे युट्युब च्यानल सञ्चार माध्यमके परिभाषामे नइपर्ना उहाँ बटैलै । अध्यक्ष बस्नेत पत्रकार आचारसंहिताके पालना नइकरके मनलग्दी कैना जे कोई पत्रकार नइहुइना बटैलै ।
‘यदि कोई दर्ता करके विधि प्रक्रियाके जाके पत्रकार आचारसंहिता पालना करी कलेसे उहीहे स्वागत करी,’ उहाँ कहलै, ‘अन्यथा मनपरी करके होहल्ला कैना पत्रकार नइहुइट । मनपरी करुइयाहे कारबाही कैबी । कुहीहे कारबाहीके दायरामे फे नन्ले बटी ।’ यी आघे चार जाने युटुबरहे कारबाहीके दायरामे नानलपाछे कुछ व्यक्ति प्रक्रियामे जाके व्यवस्थित रूपके काम करम कहटी सम्पर्कमे अइटी रहल उहाँ बटैलै ।
कार्यक्रममे नेपाल पत्रकार महासंघके केन्द्र्रीय सदस्य भरत शाह, प्रेस काउन्सिल नेपालके सदस्य हरि प्रसाद जोशी, लालबाबु शेख, नेपाल पत्रकार महासंघके पूर्व केन्द्रीय उपसभापति चित्राण थापा, पूर्व केन्द्रीय सदस्य मनमोहन स्वाँर, श्याम भट्ट, दिल बहादुर छत्याल, मीन बम, कर्ण शाह, बानके केन्द्रीय उपमहासचिव गोविन्द रोस्यारा, नेपाल पत्रकार महासंघ कैलालीके निवर्तमान सभापति जगत साउदलगायत मन्तव्य व्यक्त करले रहिट ।
कार्यक्रममे प्रेस काउन्सिल नेपालके मिडिया अनुगमनकर्ता कुशल आर्याल पत्रकार आचारसंहिता ओ सुदूरपश्चिम प्रदेशमे रहल संचारमाध्यमके बारेमे जानकारी डेहल रहिट । कार्यक्रम नेपाल पत्रकार महासंघ कैलालीके अध्यक्षता हिमालय जोशीके अध्यक्षतामे हुइल रहे कलेसे संचालन सचिव प्रेम चौधरी करले रहिट ।
